И покрај предизвиците, како што се многу нови платформи за вести, лажни вести, префрлување на огласувањето и профитот на Гугл и други глобални платформи, новинските агенции имаат иднина, и уште повеќе, имаат блескава иднина, токму во околностите во кои тие остануваат единствениот веродостоен извор на точни информации, вели Јан Филипс, еден од директорите на АП.
Иднината на традиционалните медиуми, особено на новинските агенции, беше темата на еден од панелите во рамките на Меѓународниот економски форум во Санкт Петербург, во организација на руската агенција ТАСС, со учество на директорот на ТАСС Сергеј Михајлов, Јан Филипс од АП, директор на британската П.А. група Клајв Маршал, Џузепе Чербоне од италијанската АНСА и Хироки Сигити од агенцијата Киодо од Јапонија.
Тие предочија дека брзиот развој на дигиталната технологија, појавата на социјални мрежи и новите медиуми, ги ставија новинските агенции, како главен извор на вести за сите традиционални медиуми, пред сериозен предизвик, кој наметнува преиспитување на улогата и моделот на работа на новински агенции.
Менаџерите и уредниците на водечките светски агенции веруваат дека одговорот на овие предизвици е во суштинските начела на кои се темелат новинските агенции, а тоа значи: добар бизнис, добар менаџмент, добар бренд.
Според Чербоне, брендот подразбира кредибилитет и довербата на клиентите, или како основни принципи и квалитет на известувањата на агенцијата, Филипс го гледа во тоа да се биде прв, да се биде релевантен и точен.
Тоа е „шифрата“ која, според дискутантите, ја гарантираат иднината на новинските агенции и покрај тоа што е тешко да се препознаат лажните вести од релевантните и точни информации и информациите од јавен интерес.
Според Филипс, јавноста, на крајот, бара јасни и транспарентни информации, кои потекнуваат од веродостоен извор и тоа именуван.
Суровите услови на пазарот, сè помалку пари од огласувањето во медиумите, а се повеќе на дигитални платформи, доведуваат до пропаѓање на медиумите на глобално ниво, и се наметнува потребата повторно да се преиспита бизнис моделот на јавно-приватно партнерство во медиумите, заклучија дискутантите.
