Стефан Марковски, писател
Доколку се оформи агенција или биро за книга ќе се овозможи промоција на македонската литература во светски рамки преку финансирање преводи, вмрежување, соодветно рекламирање и претставување, посочува писателот Стефан Марковски
Писателот Стефан Марковски смета дека ни е потребна агенција или биро за книга како државен орган што би функционирал во состав на Министерството за култура, на едно ниво што би било повисоко од нивото на Секторот за книга, што подразбира поимање на литературата како дел од националната стратегија на една држава и соодветно третирање во таа насока.
Според него, државата преку оваа институција би го оспособила систематичното промовирање на литературата како интегрален и неотуѓив дел од нејзиното духовно битие преку различни механизми за поддршка и меѓународно претставување на сопствената „национална литература“, притоа излегувајќи им во пресрет на барањата и потребите пред сè на создавачите, односно на индивидуалните автори и преведувачите, кои во многу случаи се занемарувани или обесправени, односно загрозени од одредени апетити на издавачите.
– Промоцијата на македонската литература во светски рамки преку финансирање преводи, вмрежување, соодветно рекламирање и претставување во одредени книжевни средини би се реализирала на сосема друго ниво и со друга динамика, кои таа несомнено ги заслужува. Активностите на агенцијата би се реализирале и во насока на носење регулатива што од правен аспект би овозможувала и една посеопфатна заштита на писателите и книжевните создавачи, односно нивните права – посочува Стефан Марковски.
Според него, еден од многуте чекори што државата би можела да ги преземе во насока на системска помош за институциите и организациите врзани за литературата и издавачката дејност, каде што покрај различните издавачки куќи и културно-образовните институции влегуваат и книжевните асоцијации (каде што се вбројува, на пример, и Друштвото на писателите на Македонија), е поддршката на нивното организирано меѓународно дејствување.
– Всушност, една можност за ваква меѓународна промоција на својата литература, за Македонија е токму членството на Друштвото на писателите на Македонија во Европскиот писателски совет. Станува збор за книжевна заедница со седиште во Брисел, каде што членуваат 46 национални здруженија на писатели и книжевни преведувачи и синдикати во 31 европска земја, што ги вклучува членките на ЕУ, но и некои други европски земји со вкупно членство од над 160.000 писатели – споделува Стефан.
Благодарение на членството, македонската литература ќе се распространи, ќе отвори многубројни можности за писателите.
На прашањето што е потребно за да се оформи агенција за книга, тој додава:
– Ми се чини, пред сè „политичка“ волја и вистинска желба и визија да им се помогне на македонските писатели, во прв план. А тоа, пак, е поврзано со административна подготовка на соодветно законско решение, кое би стапило во сила по поминувањето низ соодветната законска процедура. Немам сомнеж дека кај одредени институционални кадри постои свесност што всушност би подразбирала агенцијата, но, како што реков, волјата и визијата се двата клучни предуслова за преземањето конкретни чекори.
ДПМ дел од Европскиот писателски совет
Друштвото на писателите на Македонија стана член на Европскиот писателски совет. Европскиот писателски совет, најголема европска федерација на писателски асоцијации со седиште во Брисел, годинава на 4 јуни во Берлин одржа генерално собрание на кое едногласно беа примени пет нови членки – писателски асоцијации од различни европски земји: Македонија, Франција, Данска. Овој историски успех на Друштвото на писателите на Македонија подразбира отворање можности за различни форми на соработка со 160.000 писатели и преведувачи од 46 европски национални организации на писатели и преведувачи во 30 земји, вклучувајќи ги земјите од ЕУ, но и други европски земји.
