Американскиот претседател Џо Бајден во вторникот одржа голем говор во полскиот главен град Варшава, по посетата на украинската престолнина Киев во понеделникот. Бајден зборуваше во ист ден кога Путин одржа говор во Федералното собрание за состојбата на државата и порача дека е „невозможно да се победи Русија на бојното поле“, додека советникот за национална безбедност на Белата куќа, Џејк Саливан, рече дека „обраќањето на Бајден нема директна врска со обраќањето на Путин“
-Една година од оваа војна, Путин веќе не се сомнева во силата на нашата коалиција, но сѐ уште се сомнева во нашата убеденост, се сомнева во нашата понатамошна поддршка на Украина, се сомнева дека НАТО ќе остане обединето. Но не треба да има сомнеж. Нашата поддршка за Украина нема да се намали, НАТО нема да биде поделено и ние нема да се умориме – рече Бајден, што беше дочекано со овации.
– Киев стои висок, горд и, што е најважно, слободен. Путин мислеше дека ќе се предадеме, погреши. Мислеше дека НАТО ќе се претвори во Финска, а наместо тоа се случи натоизацијата на Финска и Шведска – рече Бајден, додавајќи дека НАТО е пообединет од кога било досега.
– Путин повеќе се сомнева во нашето единство, но се сомнева и во нашата истрајност. Но нема сомнеж, нашата поддршка за Украина нема да попушти и нема да се умориме. Љубовта на украинскиот народ ќе надвладее над желбата на Путин за моќ и земја. Станува збор за слободата – кажа Бајден, кој во неколку наврати ги спомена вредностите на демократијата.
– Автократите разбираат само еден збор – не, не, не – кажа американскиот претседател и додаде дека „Украина никогаш нема да биде руска победа“.
Путин ги обвини Киев, САД и она што го гледа како „арогантен“ Запад дека ја започнале војната во Украина. Русија сега мора да се брани. Бајден не го игнорираше тоа тврдење, туку директно му се обрати на рускиот народ во својот говор.
– Им се обраќам на граѓаните на Русија. САД и НАТО не сакаат да ја уништат Русија, нема заговор против Русија, како што рече денеска Путин. Оваа војна не е неопходност, туку трагедија. Путин ја избра оваа војна и може да ја заврши со една реченица. Победата на Русија би значела крај на Украина, затоа се грижиме Украина да може да се брани – изјави американскиот претседател.
Бајден додаде дека додека Путин мислел дека Западот ќе зависи од руските енергетски пазари. Тие, наместо тоа, нашле други пазари и работеле заедно со САД за да ѝ се стави крај на зависноста од руските фосилни горива.
– Тој мислеше дека автократите како него се тешки, а демократските лидери слаби, а потоа ја запозна железната волја на американскиот народ. Путин се обиде да ја изгладни Европа, да ја спречи Украина да извезува храна, да предизвика глобална прехранбена криза. Ова особено ќе ги погоди африканските земји. Ги воведовме најсилните санкции што некогаш ѝ биле наметнати на една земја и ќе воведеме повеќе. Имаме со што да се гордееме во изминатата година. Но, сепак, ќе има тешки денови. Ќе застанеме зад Украина додека таа се брани. Продолжуваме да го одржуваме најголемиот режим на санкции наметнат на која било земја во историјата. И ќе објавиме повеќе санкции оваа недела заедно со нашите партнери – дополни Бајден.
Во својот говор американскиот претседател зборуваше за „нераскинливата обврска“ на САД кога станува збор за одбраната на НАТО и помагањето на Украина во одбраната од Русија: финансиски, со оружје и муниција, колку што е потребно. Бајден не ги спомна оружените системи или временските рокови, но рече „одлуките што ќе ги донесеме во следните пет години ќе ги дефинираат нашите животи во децениите што доаѓаат“.
– Рускиот лидер на крајот ги натера Финска и Шведска да влезат во НАТО – рече американскиот претседател, додавајќи дека НАТО е „пообединет од кога било“.
– Членот пет од НАТО е цврст како камен, нападот врз еден е напад на сите, тоа е света заклетва, a света заклетва е да се брани секој сантиметар од територијата на НАТО – рече Бајден.
Тој предупреди дека претстојат „тешки и горчливи денови“, но вети дека Соединетите Американски Држави и нивните сојузници „ќе ѝ го чуваат грбот на Украина“.
Американскиот претседател објави дека Соединетите Американски Држави ќе бидат домаќин на самитот на НАТО следната година.
– Следната година ќе ѝ бидеме домаќин на секоја членка на НАТО во САД. Заедно ќе ја прославиме 75-годишнината од најсилниот одбранбен сојуз во историјата на светот: НАТО – рече Бајден за време на говорот во Варшава.
Тој исто така ја потврди посветеноста на САД на европската безбедност.
– Мора да имаме безбедност во Европа. Тоа е толку основно, толку едноставно и толку последователно. Како што му кажав на претседателот Зеленски кога разговаравме вчера во Киев, веројатно можам да кажам дека нашата поддршка за Украина останува непоколеблива – рече Бајден.
Тој му оддаде почит за храброста на украинскиот претседател Володимир Зеленски, при што рече дека неговата храброст е кована во оган и челик.
– Демократијата во светот зајакна, не ослабе, но светските автократи ослабеа – додаде Бајден.
На крајот од својот говор, американскиот претседател рече дека одлуките донесени во следните пет години ќе го дефинираат светот во наредните децении.
– Одлуките се наши, а принципите и влогот се вечни – рече тој, додавајќи дека тоа е избор меѓу хаосот и стабилноста, надежта и стравот, демократијата што го воздигнува човечкиот дух и бруталните раце на диктаторот.
Говорот го заврши со благодарност до Полска, сојузниците, украинската армија и „сите што ја бранат слободата“.
– Одиме напред со вера и убедување и посветеност на сојузниците, не кон темнината, туку кон светлината – заклучи американскиот претседател.
