Во Собранието е донесен закон чија цел беше да се спречи саботирање на заедниците од страна на други чинители. Ќе предложам Владата да го прати законот до Венецијанската комисија за таа да каже дали има спорни елементи, рече министерот за надворешни работи Бујар Османи одговарајќи на новинарски прашања за време на посетата на Софија.
Османи го информирал шефот на бугарската дипломатија Николај Милков и за активностите за спроведувањето на протоколот на работната група за политичка координација со која тој лично раководи.
– Сакам да верувам дека заедно со колегата Милков ќе сториме сѐ за да не дозволиме други да ни ја водат надворешната политика, други на ди ги кројат билатералните односи, туку ние двајца, заедно со дипломатите од нашите министерства, во духот на европските вредности ќе продолжиме да градиме европска иднина за сите наши граѓани. Не треба да заборавиме дека сме ние актуелни сојузници во НАТО, идни партнери во Европската Унија, но пред сѐ пријатели и добри соседи, и очекувам нашата соработка да се развива соодветно – истакна Османи.
Во рамките на средбата беше донесена и одлука за одржувањето на претстојниот бизнис-форум меѓу двете земји, во декември, на кој ќе разгледуваат начините за заедничко справување со најактуелните прашања какви што се енергетските предизвици, како и за соработката во земјоделието, во здравството, и за валоризирање на придобивките од прекуграничната соработка.
– За динамиката на меѓусебната соработка зборува и растот на трговската размена која за првите осум месеци од оваа година изнесува над 710 милиони евра, што е зголемување од точно 52 отсто во однос на истиот период минатата година и ја става Бугарија на петто место на листата на држави со кои имаме најголема трговска размена – нагласи Османи пред новинарите и додаде дека очекува со овој тренд до крајот на годината трговската размена да надмине една милијарда евра.
На средбата, како што е наведено во соопштението, се направи пресек и на досегашните активности во однос на отворањето на Граничниот премин Клепало, како и на соработката на планот на културата, притоа јасно охрабрувајќи го интензивирањето на културната соработка која преку своите универзални вредности треба да дејствува во насока на зближување и градење пријателство меѓу двата народи.
