На Прилеп викендов му претстојат три фестивалски џез вечери во рамки на јубилејното петнаесетто издание на „Прилеп џез викенд“ („Prilep Jazz Weekend) што ќе се случи на први, втори и трети октомври во киното „Мис Стон“ при НУЦК „Марко Цепенков“.
– Во рамки на програмата публиката ќе има можност да проследи настапи на истакнати музички имиња кои низ различни џез изрази ќе донесат свежа енергија и музика без граници-велат организаторите.
На фестивалот ќе настапат Глигор Кондовски и Дориан Јовановиќ, „Сетхстат“ (Sethstat). Џез за Чудаци, Пијан славеј и Пич вајс (Peach vice).
Во минативе петнаесет години „Прилеп џез викенд изгради препознатливо место на македонската културна и музичка мапа. Фестивалот останува посветен на поддршката на оригиналната музичка мисла, на отворањето простор за нови звучни истражувања и на создавање средби меѓу музичарите и публиката. Ова јубилејно издание е покана за три вечери исполнети со импровизација, ритам, емоција и слобода-токму она што џезот го прави жив, возбудлив и секогаш современ-велат организаторите. Ф.Д.
