- Лидери од областа на образованието, креирањето политики и истражувањето на шахот ќе се соберат за време на 46. ШО на ФИДЕ
Светската шаховска федерација (ФИДЕ) ќе биде домаќин на Самитот на ФИДЕ за шахот во образованието 2026, кој ќе се одржи на 24 септември во Самарканд, Узбекистан, паралелно со 46. Шаховска олимпијада (ШО) и Конгресот на ФИДЕ. Самитот е централен настан во рамките на Годината на шахот во образованието 2026, а организаторите ги повикуваат едукаторите, креаторите на политиките, истражувачите и иноваторите во областа на шахот во образованието од целиот свет да се регистрираат и да го обезбедат своето место.
Под мотото „Секој час е важен“, Самитот ги обединува претставниците на глобалното движење за шах во образованието за да ги разгледаат моменталната состојба во оваа област и идните насоки на нејзиниот развој – од долгогодишни национални програми до нови иницијативи на локално ниво и партнерства со високообразовни институции. Домаќин на настанот ќе биде Сајмон Беланже, видеограф, актер и креатор на содржини поврзани со шахот, познат пред публиката како Симон Плеј Чес.
Вториот дел (14–15.30 ч) опфаќа серија пократки, динамични панел-дискусии што ги следат минатото, сегашноста и иднината на шахот во образованието: осврт на воспоставените национални програми, предизвиците со кои се соочуваат новите пилот-иницијативи и идните чекори со вклучувањето на високообразовните институции и непрофитните организации како партнери. Потоа настанот продолжува со третиот дел (16–18 ч.) – завршен блок од шест подолги и детални предавања за иновации во образованието.
Секое од нив длабински обработува одредена тема: шахот како алатка за заедниците на бегалци и оние погодени од конфликти; развојот на програмите на ФИДЕ за шах во образованието; како шахот да се направи привлечен и забавен за секое дете; улогата на шахот во поттикнувањето на учењето и поврзувањето на заедниците низ светот; резултатите од новата глобална анкета за шахот во образованието; како и влијанието на шахот надвор од салите за турнири.
За да се поддржат учесниците од целиот свет, на Самитот ќе биде обезбеден говорен превод во реално време на 64 јазици; присутните треба да понесат сопствени слушалки. Регистрацијата е задолжителна за сите посетители што сакаат да присуствуваат лично. Регистрирајте се на: https://edu-summit2026.fide.com/. Секој час е важен. Секое дете може да има корист. Придружете ѝ се на ФИДЕ во Самарканд овој септември и помогнете во обликувањето на иднината на шахот во образованието. Учесниците на кои им е потребно официјално писмо со покана, на пример, како поддршка за барање за виза, треба да стапат во контакт со Рита Аткинс, секретар на Комисијата за шах во образованието при ФИДЕ, на адресата [email protected]. Г.И.
