Возраста за пензионирање во Европската Унија во наредните децении ќе продолжи да расте, а до крајот на 2060-тите просечната старосна граница ќе достигне 66,9 години за мажите и 66,6 години за жените, покажува анализата на „Евроњуз“, базирана на податоците од извештајот на Организацијата за економска соработка и развој (ОЕЦД) „Пензиите на прв поглед 2025“.
Според анализата, околу две третини од европските земји ќе ја зголемат старосната граница за пензионирање на мажите, додека кај жените тоа ќе го направат три четвртини од државите. Во просек, пензиската возраст во ЕУ ќе порасне за 2,1 година кај мажите и за 2,6 години кај жените.
ОЕЦД оценува дека зголемувањето на пензиската возраст останува една од главните мерки за обезбедување финансиска одржливост на пензиските системи, наместо намалување на пензиите или зголемување на придонесите.
Во извештајот се предупредува дека европското население забрзано старее. До 2050 година, на секои 100 лица на возраст од 20 до 64 години ќе има 52 жители постари од 65 години, во споредба со 33 во 2025 година и само 22 во 2000 година.
Данска ќе има највисока пензиска возраст
Во моментов, највисока старосна граница за пензионирање на мажите – 67 години – имаат Данска, Норвешка, Исланд и Холандија, додека просекот во ЕУ е 64,7 години.
Според проекциите, Данска до крајот на 2060-тите ќе ја зголеми пензиската возраст на дури 74 години. Следуваат Естонија со 71 година, како и Италија, Холандија, Шведска и Кипар со по 70 години.
Најниска пензиска возраст за мажите ќе имаат Словенија и Луксембург – 62 години.
Турција со најголем раст
Најголемо зголемување на старосната граница се очекува во Турција, каде што пензионирањето на мажите ќе се помести од 52 на 65 години, односно за 13 години.
Значителни зголемувања се предвидуваат и во Данска, Естонија, Италија, Словачка и Кипар, додека во Германија и Франција пензиската возраст ќе порасне за помалку од една година.
И жените ќе работат подолго
И кај жените највисока сегашна пензиска возраст имаат Данска, Холандија, Исланд и Норвешка – 67 години, додека просекот во ЕУ е 64 години.
Проекциите покажуваат дека Данска ќе достигне 74 години, Естонија 71, а Италија, Холандија, Шведска и Кипар по 70 години.
Најниска пензиска возраст за жените ќе има Полска – 60 години.
Најголем раст повторно се очекува во Турција, каде што старосната граница ќе се зголеми од 49 на 63 години. Значителни зголемувања се предвидуваат и во Данска, Италија, Естонија, Словачка, Кипар, Романија и Австрија.
Во дел од земјите, меѓу кои Германија и Франција, зголемувањето ќе биде минимално, а во Шпанија пензиската возраст за жените ќе остане непроменета – 65 години.
Во извештајот се наведува дека во некои држави идната пензиска возраст ќе зависи и од очекуваниот животен век, што може дополнително да влијае врз планираните реформи.
