Масовни демонстрации се одржаа вчера во Тирана, на кои демонстрантите бараа оставка од премиерот Еди Рама, привремена замена на неговата влада, уставни реформи и крај на корупцијата, објави „Еј-би-си њуз“.
Медиумските снимки покажаа десетици илјади луѓе како маршираат по главниот булевар во Тирана кон плоштадот Скендербег. Нема независна потврда за бројот на демонстранти.
Ноќните демонстрации започнаа поради проектот за развој на луксузно крајбрежно одморалиште во заштитено природно подрачје поврзано со зетот на американскиот претседател Доналд Трамп, Џаред Кушнер, но оттогаш еволуираа во пошироки антивладини и антикорупциски протести. Демонстрантите скандираа „Нова Албанија“ и „Еди Рама, поднеси оставка“.
Маршот беше преполн со симболика. Беше подигната висока биста на Рама, која подоцна беше соборена со помош на јаже, гест што потсетува на соборувањето на статуата на долгогодишниот комунистички диктатор Енвер Хоџа во февруари 1991 година, настан што се одбележува на 20 февруари секоја година. Бидејќи вчерашниот протест се совпадна со 62-риот роденден на Рама, некои демонстранти носеа „торти за роденден“ направени од цемент, алузија на градежните проекти. Исто така, имаше и иронична песна „среќен роденден“ за Рама.
Некои демонстранти носеа розови балони со фламинго, алудирање на птиците за кои се претпоставува дека се загрозени од проектот за изградба на одморалиште. Демонстрациите долго време се нарекуваат „револуција на розовите фламинго“.
По околу два часа протест, голема група маршираше до полициска станица, барајќи ослободување на лицата уапсени за време на протестот во четвртокот во близина на парламентот.
Демонстрантите ги скршија прозорците на полициската станица, додека полицијата одговори со водени топови за да ја растера толпата.
