Италијанските научници од проектот „Си кеар“ открија гени отпорни на антибиотици во медитеранскиот, атлантскиот, арктичкиот и други региони, со повисоки концентрации во близината на прометни морски патишта и густо населени крајбрежни области, според студија презентирана на форум за океаните и здравјето на луѓето во Рим.
Според резултатите од анализата на примероци од морска вода од целиот свет, океаните дејствуваат како резервоар за загадувањето што потекнува од копното, со што се пренесуваат генетските траги од употребата на антибиотици и урбаните отпадни води далеку од нивните извори.
– Заштитата на здравјето на луѓето денес неизбежно значи грижа за морињата и океаните – рече генералниот директор на Италијанскиот институт за здравство.
Студијата исто така откри големи количества на микропластика, „вечни хемикалии“ ПФАС и траги од генетски материјал на САРС-ЦО В-2, дури и во отворените океани и оддалечените области.
Проектот „Си кеар“, предводен од Италија, ги собра претставниците од институции како што се ИСС, италијанската морнарица и меѓународни истражувачки центри за да создадат глобален систем за следење на океаните користејќи поморски патишта и научни мрежи за собирање примероци за време на редовни мисии. Досега се собрани повеќе од 4.000 примероци од морска вода од над 140 локации во Медитеранот, Атлантикот, Тихи Океан, Арктикот и Индиски Океан. Научниците истакнуваат дека проектот покажува дека океаните може да послужат како систем за рано предупредување за глобални здравствени ризици, поддржувајќи политики насочени кон борба против загадувањето, климатските промени и новите закани за здравјето на луѓето.
