Кинеските брендови за убавина стекнуваат популарност низ светот. Според Генералната царинска управа на Кина, извозот на козметика се зголемил за 11,7 проценти на годишно ниво на 36,68 милијарди јуани (околу 5,2 милијарди американски долари) во првите осум месеци од 2025 година, што означува трета година по ред со двоцифрен раст. Повеќе од 50 кинески бренда се прошириле во странство. Тие повеќе не се ограничени на прекугранични платформи, што го нагласува забрзувањето на меѓународниот подем на секторот.
Брендови како што се „Флорасис“ и „Флауер ноус“ влегоа во мејнстрим потрошувачки синџири, вклучувајќи ги и оние во САД. А во 2025 година, неколку кинески компании за козметика, како на пример „Џудидол“ и „Флорасис“ отворија свои самостојни продавници во странство.
– Прашањето сега не е дали кинеската козметика има место во странство, туку колку големо ќе биде тоа место – изјави за „Синхуа“, Жанг Јан, претседател на Здружението на индустријата за здравствени производи и козметика во Џеџијанг.
Според податоците од платформата на кинескиот гигант за онлајн трговија „Алибаба“, Северна Америка останува најголемата дестинација за кинеските козметички производи, при што САД сочинуваат речиси една четвртина од нарачките, со годишен раст од 30 проценти. Побарувачката исто така брзо расте во Европа и на Блискиот Исток, додека Југоисточна Азија останува најбрзорастечкиот регион.
– Со производите што сега достигнуваат повеќе од 180 земји и региони, секторот повеќе не зависи од ниту еден единствен пазар – рече Дуан Јуван, заменик-декан на Факултетот за меѓународна економија и трговија на Централниот универзитет за финансии и економија.
