КОШАРКА – ПРЕТКВАЛИФИКАЦИИ ЗА ЕП 2029
- Ова е прв добар чекор за нас во овој циклус. Влеговме како фаворити и го оправдавме тоа, но има уште многу до нашата посакувана цел и форма, вели репрезентативецот Јакимовски
Машката сениорска кошаркарска репрезентација на Македонија, предводена од селекторот Марјан Илиевски, со убедлива победа од 87-49 (22-13, 18-8, 23-16, 24-12) против селекцијата на Азербејџан во рамките на групата А ги започнаа претквалификациите за пласман на Европското првенство (ЕП) во 2029 година во Естонија, Грција, Словенија и Шпанија. Во СЦ „Кале“ во Скопје, црвено-жолтите дејствуваа моќно, разиграно, убедливо, а тоа го покажува и разликата од дури 38 коша. Ова, секако, претставува и добра увертира за вториот натпревар од оваа група, кој Македонија ќе го игра утре во Даблин (18 часот) против селекцијата на Ирска. Во вториот натпревар од оваа група, Луксембург на свој терен со 89-77 ја совлада Ирска. Победникот на секоја од четирите групи и најдобрата второпласирана репрезентација ќе обезбедат играње во квалификациите на ЕП 2029.
– Заслужена победа. Морам да ги пофалам тимската хемија и енергија што постојат во овие три дена. Никогаш ниту преценуваме ниту потценуваме некого. Играчите за краток период функционираа одлично, а тоа што го покажаа на теренот и на семафорот е заслужено. Овој дуел со Азербејџан го забораваме и архивираме, се подготвуваме за она што ни следува, а тоа е Ирска. Мора да направиме добар скаутинг и во краткиот период да ги рехабилитираме играчите што имаат поголема минутажа и се повозрасни. Мора да функционираме со енергија на високо ниво и, без разлика кој е на другата страна, да бидеме максимални. На овој меч играше Омари Мур затоа што имаше промена во нивниот тим кај натурализираните играчи, па ние решивме да користиме играч на бековска позиција. Секако дека тој ги оправда очекувањата на стартот, се вклопи добро иако дојде веднаш по мечот со Баерн. Станува збор за вистински професионалец, кој донесе стабилност во играта со своето искуство и добро си ја заврши задачата –изјави задоволно по мечот селекторот Илиевски.
Македонија одигра одлично во првото полувреме, особено во одбраната, која на противникот му дозволи да постигне само 21 кош, а пак нападот да реализира речиси двојно повеќе, 40. Уште поубедлива игра беше видена во второто полувреме, кога разликата беше речиси двојно зголемена, а во финишот на мечот, пак, селекторот Илиевски им даде шанса да влезат во игра на сите репрезентативци.
– Ова е прв добар чекор за нас во овој циклус. Влеговме како фаворити и го оправдавме тоа, но има уште многу до нашата посакувана цел и форма. На добар пат сме и се надевам дека во наредните циклуси ќе бидеме комплетни. Нашиот фокус сега е на Ирска. Се работи за посилна селекција од Азербејџан. Овој период е многу краток, но мора да го искористиме за да се уиграме и запознаеме. Мур е одличен играч, а го имаме и Вајли. Наше е да се подобруваме од ден на ден и да го дадеме нашиот максимум. Имав многу измешани емоции на враќањето во репрезентацијата. Сакав и претходно да играм, но поради некои оправдани причини, не можев. Среќен сум што сум тука, ќе се јавувам на повикот на селекторот ако сум подготвен и здрав. Задоволен сум и како одиграв, иако секогаш може подобро – рече по триумфот најдобриот поединец против Азербејџан, Андреј Јакимовски.
Јакимовски беше прв стрелец на мечот со двоен ефект, 25 коша и 11 скока. Двоен ефект од 16 коша и 11 скока имаше и македонскиот капитен Војдан Стојановски, Лејсон Зеќири уфрли 17 поени. Во своето деби за Македонија, Омари Мур запиша шест коша, исто толку скока и девет асистенции. Кај гостите, Амил Хамзаев беше најефикасен со 12 поени.
Македонија досега настапи на пет европски првенства, а најдобриот пласман го оствари во 2011 година во Литванија, на четвртата позиција. Од ривалите во групата, само Луксембург настапил трипати, во 1946 година бил осми, во 1951 се пласирал на 17-то место, а во 1955 година бил 15-ти. Г.И.
ГРУПА А
Македонија – Азербејџан 87-49
Луксембург – Ирска 89-77
двојки 2. коло, утре
Азербејџан – Луксембург 15 ч.
Ирска – Македонија 18 ч.
