Американскиот државен секретар Марко Рубио го нарече процесот на решавање на руската војна во Украина можеби најтешкиот предизвик и изјави дека трпението на американскиот претседател, Доналд Трамп, не е неограничено.
Рубио, за време на министерскиот состанок на Советот за безбедност на ОН посветен на Украина, рече дека САД нема да се двоумат да воведат санкции против Русија или да продадат одбранбено, а потенцијално и офанзивно оружје, на Киев со цел да ја принудат Москва на мир.
– Војната во Украина – војната меѓу Русија и Украина се покажа како исклучително тежок предизвик – нагласи американскиот државен секретар за време на својот говор, објави Стејт департментот утрово.
Тој истакна дека Трамп и неговиот тим „неуморно работат“ за да постигнат решение, посветувајќи огромно количество од своето време и енергија на тоа, и дека војната во Украина не може да се заврши воено.
– Ќе заврши на преговарачката маса – таму ќе заврши оваа војна. Но, колку подолго трае, колку повеќе луѓе ќе умрат, толку повеќе уништување ќе има – додаде шефот на Стејт департментот.
Според неговите зборови, американскиот претседател „покажал извонредно трпение, избегнувајќи дополнителни санкции против Русија со надеж дека ќе постигне напредок по ова прашање“.
– А сега гледаме и упади во соседниот воздушен простор и од беспилотни летала и од авиони – додаде Рубио.
Државниот секретар на САД нагласи дека претседателот на САД има способност и опции да воведе дополнителни економски санкции против Русија, доколку е потребно, со цел да се запре овој развој на настаните.
Покрај тоа, според него, Трамп има што е потребно за да продаде „одбранбено и, очигледно, офанзивно оружје за Украина да може да се одбрани од овие напади“.
– Ќе дојде момент кога ќе бидеме принудени да заклучиме дека, очигледно, нема интерес за мирно решение. И тогаш претседателот ќе има вистински опции пред себе, кои ќе ги спроведе, како што јасно нагласи денес во некои од неговите изјави – нагласи Рубио.
Тој, исто така, ги повика земјите-членки на ОН да сторат сè што можат за да помогнат во завршувањето на руско-украинската војна, соопшти Стејт департментот.
