Американската разузнавачка служба (ЦИА) предупредува за ширење на радикалниот исламизам во регионов
Корпусот на исламската револуционерна гарда Кудс (Ерусалим), кој „е специјализиран за странски мисии, обезбедувајќи совети, финансирање, водство, материјална поддршка, обука и оружје за милитантите, дејствува на територијата на Босна и Херцеговина, се наведува во делот „тероризам“ во ажурираниот извештај на ЦИА објавен на 13 август.
Вахабистите активни во БиХ од избувнувањето на војните во поранешна Југославија до денес
Досега објавени официјални податоци укажуваат дека Иран на почетокот на 90-тите години од минатиот век бил главен спонзор на организацијата на поранешниот претседател на БиХ, Алија Изетбеговиќ, како и дека инструктори на силите Кудс за воена обука за саботажа, разузнавање и контраразузнавање биле првите присутни на територијата на оваа поранешна република на Југославија. Австрискиот истражувачки центар МЕНА наведува дека силите Кудс пристигнале во БиХ само шест месеци по почетокот на војната и дека Иран испратил илјадници борци во БиХ под маската на вработени во Црвената полумесечина. Администрацијата на тогашниот американски претседател Бил Клинтон знаела и го одобрила тоа, што го откриле американски новинари и го потврдиле во 1998 година со конгресна истрага по барање на републиканците.
Вахабистите почнале да пристигнуваат во Босна и Херцеговина од 1993 година, кога влијанието на шиитскиот Иран постепено слабее, а влијанието на американските сојузници, Саудиска Арабија и Турција, е во пораст. Благодарение на нив, ултраконзервативното исламистичко салафистичко или вахабистичко движење, нивните муџахедини и огнени проповедници доаѓаат на Балканот. По војната, тие добиваат државјанство од Сараево и формираат затворени заедници, од кои започнува индоктринацијата со најригидниот исламизам.
Денес е познато дека вахабистите од Босна и Херцеговина стоеја зад многу терористички напади низ светот и дадоа голем број муџахедини на Исламската држава. Кога Америка почна да ги прогонува, сфаќајќи дека и тие се вклучени во нападот врз кулите близначки во Њујорк на 11 септември 2001 година, официјално Сараево се обидува да ги заштити на секој начин.
Политичките пропусти и странската поддршка го поттикнуваат исламскиот радикализам
Политичкиот аналитичар и експерт за безбедност и тероризам од БиХ, Џевад Галијашевиќ, споменува дека бил сведок и на акциите на корпусот на исламската револуционерна гарда, кој имал камп во БиХ каде што обучувал терористи и подготвувал атентати на опозициски муслимански политичари. Кампот бил уништен, но тоа не ги запрело активностите на силите Кудс. Тие најмногу ги загрижуваат Американците, особено во контекст на неодамна замрзнатата иранско-израелска војна, па се поставува прашањето дали ЦИА има сознанија оти во БиХ се присутни сто вахабистички населби и десетици поврзани конгрегации, регионални религиозни заедници споменати од Галијашевиќ.
Високиот претставник за БиХ, Кристијан Шмит, од друга страна, не ги регистрира ниту вахабистите ниту силите Кудс, кои исто така имаат континуитет со 1990-тите години.
– Во Босна и Херцеговина, 10.000 луѓе минуваат низ безбедносните евиденции како извор на терористичка закана. Во оваа земја остатоците од одредот „Ел Муџахид“ и глобалните терористи имаат свои места. Дури и денес Босна и Херцеговина е отскочна штица за тероризам во Европа, што го потврдуваат разни инциденти, од кои некои се евидентирани, а некои не – рече Галијашевиќ за агенцијата „Срна“.
Тој верува дека духот на исламистичкиот радикализам кај Бошњаците е поттикнат од политичките пропусти од Сараево, но дека поддршката за такво дејствување доаѓа надвор од Босна и Херцеговина.
– Сараевската политика ги уништи политичкиот систем, уставниот поредок, институциите, а разузнавачката служба и безбедносните структури беа покриени од параразузнавачките структури на Иран и Турција – предупредува Галијашевиќ. Р.С.
Водење војна преку посредници
Кудс дејствува преку Хамас, Хезболах, палестинскиот исламски џихад, шиитските милиции…
Корпусот на исламската револуционерна гарда на Иран, Кудс, е специјализиран за неконвенционално војување и воено разузнавачки операции. Генералот Стенли Мекристал, кој командуваше со американските сили за време на војната во Ирак, ја опиша Кудс како организација слична на комбинација од ЦИА и Заедничката команда за специјални операции (ЈСОЦ) во САД. Тие дејствуваат надвор од Иран, главно преку посредници како што се Хезболах, Хамас, палестинскиот исламски џихад, движењето Хути, како и шиитските милиции во Ирак, Сирија и Авганистан. Кудс директно му известува на врховниот верски водач на Иран, ајатолахот Хамнеи. Во неодамнешниот извештај на ЦИА се наведува дека Кудс дејствува во земји како Авганистан, Бахреин, Либан, Ирак, Сирија и Јемен, како и преку екстремистички групи, вклучувајќи ги бригадите Ал-Аштар, Асаиб ал-Хак, Хамас, Хезболах, Катаиб Хезболах и Палестинскиот исламски џихад. Р.С.
