Премиерот Христијан Мицкоски, одговарајќи на новинарско прашање во врска со трендот на прометот во индустријата и придонесот на поединечни гранки, како и проценките на среден рок, оцени дека најмногу воодушевува индустриската активност со странство. Кога станува збор за прометот во индустријата, тој нагласи дека е евидентен огромен раст, кој достигнува до 20 проценти, а во периодот што следи очекува овие бројки да бидат уште повисоки.
-Кога станува збор за прометот во индустријата, исто така, тука морам да кажам дека имаме огромен раст којшто се брои во 16,18, 20 проценти. Но, она што најмногу воодушевува е растот во индустриската активност со странство. Односно, имаме голем извоз, тоа е суштината. И тој промет тука, го крева вкупниот промет. Тоа значи дека, во услови на криза на европскиот пазар, автомобилската индустрија, ние имаме извоз. Тоа значи дека имаме добра бизнис клима во државата, а тоа го потврдува и зголемениот број на директни странски инвестиции, коишто во периодот што следи ќе дојдат, но и оној период кој што е позади нас кои што ги отпочнаа своите вложувања во државата – изјави Мицкоски на новинарско прашање по отпочнувањето со реконструкција на гимназијата „Кирил Пејчиновиќ“ во Тетово.
Претседателот на Владата напомена дека сега е време кога државата се развива преку вложувања во проекти.
-Така што, во периодот којшто следи, очекувам уште поголеми бројки споредено со минатото. Да се навикнеме на успеси, на убави работи. Доста беше поделби, доста беше црнила, доста беше неуспеси, доста беше коленичење, свиткани кичми, криминал и корупција. Сега е време кога државата се развива, кога вложуваме во проекти, вложуваме во нови автопати, Коридор 8, Коридор 10. Земјоделци кои што високо извезуваат, индустрија која работи, тоа е суштината. Тоа е фокусот на оваа Влада и мора да се навикнеме и на вакви успеси. И впрочем, тоа го кажуваат и граѓаните на јавните мерења – порача премиерот Мицкоски.
