Турско беспилотно летало „Бајрактар Аканџи“ ја тестираше првата хиперсонична турска ракета воздух-земја, објави „Хуриет дејли њуз“, посочувајќи дека тестирањето било успешно.
Ракетата ТРГ-230 ја разви компанијата Рокетсан со седиште во Анкара и успешно ја погоди целта на оддалеченост од 100 километри од местото на лансирање.
– Бајрактар Аканџи успешно ја погоди целта со TRG-230-iHA, првата турска хиперсонична ракета развиена од Рокетсан, од далечина од 100 километри – изјави шефот на производителот на дронови Бајкар Селџук Бајрактар.
Дронот полетал од градот Чорлу во Источна Тракија и поминал растојание од околу 700 километри до предградието на црноморскиот град Синоп.
Според производителот, проектилот има ефективен дострел од 20-150 километри.
Неделава првиот лет го изврши и турскиот суперсоничен беспилотен ловец „Бајрактар Кизилелма“.
