Дали ги знаете симптомите на паничниот напад, од кој страдаат голем број луѓе во светот? Забрзаното темпо на живот и изложеноста на стрес го зголемуваат тој број од ден на ден. Но не е сè толку црно. Постојат испробани и тестирани методи за да се спречи нападот на паника, кои ни ги откриваат кардиолозите и психијатрите.
– За време на паничен напад, телото се однесува исто како и во реална опасност. Иако не се манифестираат на ист начин сите напади на паника, одговорот на нашето тело е секогаш ист, тоа се обидува да ја забрза работата и да се усогласи со мозокот. Нивото на хормонот на стресот драматично се зголемува и поради тоа започнувате да се потите, а срцето работи забрзано – објаснува кардиологот Санџив Пател од Институтот за кардиоваскуларна медицина во Калифорнија.
Иако нападот на паника генерално е невозможно да се предвиди, можно е да се смири. Постојат некои ефективни начини како да го направите тоа.
1. Пренасочете ги вашите мисли
Во моментот кога ќе се чувствувате како да ве фаќа паника, мора да си кажете себеси дека сте добро, дури и ако не сте.
– Во тој момент чувствувате дека нападот никогаш нема да заврши, па дури и дека ќе ве убие. Тогаш треба да си кажете себеси дека нема да се случи ништо страшно и да се потсетите дека тоа се случувало порано и дека секогаш поминувало – објаснува психологот Катрин Мур од Семејниот центар во Санта Моника, Калифорнија.
Заменувајќи ги ирационалните мисли со разумни, вашиот мозок му кажува на телото да се смири.
– Вашето тело мисли дека има тигар во просторијата. Потсетете се дека нема тигар – заклучува Мур.
2. Практикувајте вежби за опуштање
– Ако вашето тело има интензивна реакција на напад на паника, треба да го смирите. Најефикасен начин е да направите вежби за опуштање на одредена мускулна група. На пример, стегање и опуштање тупаница. Вежбајќи група по група мускули, вие не само што ќе го промените фокусот и ќе ги пренасочувате мислите туку ќе му помогнете на вашето тело физички да се релаксира – вели Мур.
3. Преземете ја контролата над дишењето
Паничниот напад доведува до забрзано и плитко дишење и до вртоглавица. Она што треба да го направите во тој момент е да се фокусирате на дишењето, да го продлабочите и да почувствувате како стомакот и белите дробови се полнат со воздух, а потоа при бавно издишување се празнат. Бавното длабоко дишење ќе го смири телото.
4. Развијте методи за превенција на секојдневна основа
Многу е важно да се достигне ментална сила на микрониво, односно во секојдневниот живот. Тоа се постигнува со намалување на нивото на стрес што е можно повеќе (на пример ако сте склони да доцните и сте нервозни поради тоа, обидете се да го промените тоа), хранете се поздраво, избегнувајте алкохол и кофеин, вежбајте и работите ќе почнат да се менуваат.
5. Обидете се да откриете што ви предизвикува напад на паника
Запишувајте што ве прави нервозни или што ве вознемирува во текот на денот.
– Оценувајте ја вашата анксиозност во текот на денот. За секој дел од денот, изберете оценки од еден до десет. Десет нека биде највисоката оцена за вознемиреноста што ја чувствувате во тој момент – советува психологот.
