Во издание на „Матица македонска“

Во рамките на јубилејот – триесет години од основањето, „Матица македонска“ објавува избрани дела во пет тома од писателот Блаже Миневски. Изданието го уредува Раде Силјан, а графичко-ликовниот дизајн е на Кристи Георгиевски.
Во првиот том, со наслов „Да речеме уште една“, се објавени расказите, а во преостанатите четири тома романите „Нишан“, „Свирци“, „Мрежата на Мамли“, „Мемоарите на една млечка“, „Требаше да се сликаме пред да се замразиме“ и „Фантомско стапало“. Книгите се проследени со толкувања од Митко Маџунков, Венко Андоновски, Марија Проскурнина, Оливера Ќорвезироска, Ефтим Клетников, Стефан Влахов-Мицов, Марија Ѓорѓиева Димова, Душан Стојковиќ, Јордан Плевнеш и други.
Блаже Миневски (1961) е автор на девет романи, седум драми и три книги раскази.
Романите на Миневски се преведени на англиски, ерменски, бугарски, словенечки, арапски, кинески, српски, полски и на италијански јазик, а со свои раскази е застапен во речиси сите антологии на кратка проза објавени последните триесетина години во Македонија и надвор од неа. Некои од нив се преведени на повеќе од дваесет јазици во светот.
Добитник е на повеќе награди, меѓу кои и на „Роман на годината“, „Стале Попов“ и „Рациново признание“.