Напаѓачот на Спортинг до неделата постигна 24 гола на 17 клупски меча сезонава. Европскиот рекорд на Меси е 73 погодока на 60 средби во сите натпреварувања. Ѓокереш постигна повеќе голови по 17 натпревари отколку што постигна Меси во својата рекордна сезона и постигнува гол на секои 65 минути, во споредба со Меси, кој тогаш постигнуваше погодок на секои 72 минути…
ФУДБАЛ
Виктор Ѓокереш едноставно не може да престане да постигнува голови. Напаѓачот на Спортинг до неделата постигна извонредни 24 гола во 17 клупски натпревари сезонава, а ако се додадат и натпреварите на фудбалската репрезентација на Шведска, тоа се вкупно 32 гола на 23 натпревари, пишува „Би-би-си“. Тој во моментов е на пат да го собори европскиот рекорд на Лионел Меси од 73 гола во сезоната 2011/2012, на 60 меча во сите натпреварувања. Следни на оваа листа се Герд Милер за Баерн во сезоната 1972/73 и Ференц Деак за унгарскиот Сентлоринци во сезоната 1945/46, со по 66 гола, Дикси Дин постигна 63 гола на 41 натпревар за Евертон во сезоната 1927/28, Кристијано Роналдо 61 пат ја затресе мрежата за Реал Мадрид во сезоната 2014/2015, рекордот за играч од португалската лига е 55 на Марио Жардел, за Порто во сезоната 1999/2000 и за Спортинг во 2001/2002…, пишува „Би-би-си“.
Ѓокереш постигна повеќе голови по 17 натпревари отколку што постигна Меси во својата сезона со рекорди, иако е под бројките на Милер и на Дин. Ѓокереш постигна 24 гола на 17 натпревари на Спортинг сезонава. Меси постигна 22 гола по исто толку натпревари на Барселона во сезоната 2011/2012. Во текот на сезонава, Швеѓанецот од Спортинг постигнува гол на секои 65 минути, во споредба со Меси, кој тогаш постигнуваше погодок на секои 72 минути…
Нивните стапки во Лигата на шампионите се мошне изедначени со тоа што Меси постигна 14 гола на 11 натпревари, а Ѓокереш пет на четири натпревари сезонава. За Ѓокереш да одигра 60 натпревари колку што одигра Меси таа сезона, Спортинг ќе треба да оди до завршницата во двата домашни купа на Португалија и во Лигата на шампионите. Ѓокереш постигна девет гола на шест натпревари во Лигата на нациите и за Шведска, а има уште четири натпревари сезонава. Меси постигна девет гола на девет натпревари за Аргентина во сезоната 2011/2012…
Талентот на Ѓокереш е очигледен веќе некое време, а бројот на голови се подобрува секоја сезона. Во неговите две полни сезони во Ковентри постигна 18 и 22 гола, а лани за Спортинг 43. Пред само четири сезони, тој постигна вкупно пет гола за Брајтон и како позајмен за Свонси и за Ковентри, пишува „Би-би-си“. Меси, исто така, беше на нагорна патека (иако почнувајќи од повисока точка) влегувајќи во својата рекордна сезона за Барселона откако постигна 16, 38, 47 и 53 погодока во своите претходни четири сезони. Н.М.
