„Стоби“ продолжува да гради пат кон интернационалните пазари за најдоброто македонско вино, истакна Ана Јорданова, сопственичка и главен менаџер на винарницата.
Во винарницата, празникот на лозарите Свети Трифун денеска беше одбележан со традиционално закројување на лозјата и нивно осветување. И годинава настанот се одржа во присуство на вработените на винарницата, домашни и странски гости и медиуми. Пригодна богослужба одржа свештено лице од Повардарската епархија.
Откако Минчо Јорданов и Ана Јорданова го закроија лозјето, ги повикаа и останатите да се вклучат во традицијата за плодна година.
-Оваа година во „Стоби“ имаме 15. по ред јубилејно, на некој начин, закројување на лозјето. Се надевам дека енергијата од космосот и благословот од бога ќе не заштитат од повеќе маки, ќе имаме конечно добра и нормална берба, а природните услови нема да не спречат да го добиеме најдоброто што може да го понудат македонското тло и македонскиот воздух и македонската клима. Винарницата „Стоби“ не се откажува, продолжуваме да градиме пат кон интернационалните пазари, се враќаме повторно на пазарот во Србија. Тукушто се вративме од Париз, од големиот саем „Винекспо“, следниот месец сме на „Провајн“. Го нудиме најдоброто што го има Македонија и секојдневно отвараме врати кон нови клиенти, кои имаат прилика да го запознаат најдоброто македонско вино – вели Ана Јорданова, сопственичка и главен менаџер во „Стоби“.
Св. Трифун е празник на светецот, заштитник на виновата лоза, а закројувањето, вели Андон Крстевски, главен енолог на винарницата, е првата операција по зимскиот сон на виновата лоза.
-Почнуваме со вегетативниот период кога ја закројуваме лозата за да се укроти, за да може да направиме тренажен систем со кој ние одлучуваме колку ќе е висока, на начин за грозјето да е богато се она што е потребно за да направиме квалиетно вино. Со обредот кој го имавме денеска ја оддржуваме традицијата на Македонија, на народот кој тука живеел, се благословува лозата за да е здрава и да роди добро грозје, а се молиме да не поштеди лошото време и надворешни фактори. Денеска е и ден за дружба, кога се споменуваат лозарството, лозарите, винарите – вели Андон Крстевски, главен енолог на винарницата.
Јована Томашевиќ, маркетинг-менаџер на НТ „Болеро“ од Чачак, една од присутните гости посака убав почеток на винската година на „Стоби“.
-Задоволство ни е што заедно го прославивме празникот и се надеваме на успешна соработка – вели Томашевиќ.
Фото: Маја Јаневска-Илиева
