Д-р Александар Петличковски, претседател на Комисијата за заразни болести, по нејзиниот денешен состанок, истакна дека има зголемување на нови случаи на заболени со ковид-19 меѓу децата од шест до 14 години, главно меѓу оние кои ја следат наставата со физичко присуство, но нема простор за загирженост.
– Апелираме буквално да се следат протоколите за настава со физичко пристуство, а учениците и родителите да го прифаќаат тестирањето – подвлече Петличковски, соопштувајќи дека се отвораат дополнителни три пунктови за тестирање во Скопје – во Ѓорче Петров, Идадија и Битпазар.
На овие пунктови тестирањата ќе може да се закажуваат од матичен лекар.
Петличковски апелира до учениците и до родителите да го прифаќаат тестирањето.
-Апелираме и до учениците и до родителите да го прифаќаат тестирањето, да бидат пореспонсивни кон тестирањето. Затоа отвораме неколку дополнителни пунктови за тестирање. Во Скопје од денеска пунктовите во Ѓорче Петров, Идадија и Бит Пазар се активни за закажување на термини и во нив може да се закажуваат тестирањата за ковид-19 преку матичен лекар. Дополнително планираме отворање пунктови во центрите за јавно здравје со цел тој период кој го воочивме како предолг за закажување на тестирање да го скратиме – истакна Петличковски.
Тој рече дека дискутирале околу наставата на факултетите каде што таа не се одвива со физичко присуство, туку онлајн. Предлагаат наставата во сите факултети да се насочува кон физичко присуство и повторно да биде поткрепена со вакцинирање кај студентите, како и кај наставниот кадар за да имаме најмалку проблеми во времето што доаѓа.
Кумулативниот леталитет од ковид-19, од почетокот на болеста до денес, е три отсто, соопшти денеска претседателот на Петличковски. Како што рече, одговорајќи на новинарски прашања, во јануари починале 382 лица од кои 233 невакцинирани и околу 150 вакцинирани, но повеќето само со втора доза примена пред повеќе од шест месеци.
-Според бројките од 1 до 31 јануари, од 382 починати 233 се невакцинирани, а околу 150 и нешто се вакцинирани, но најголем дел од вакцинираните се вакцинирани пред повеќе од шест месеци и немаат примено трета доза. Околу 30-тина, пак, биле вакцинирани во рок помал од шест месеци – информира Петличковски.
