Научниците идентификувале ген кој двојно го зголемува ризикот од смртност и е одговорен за откажување на респираторниот систем кај болните од коронавирус, пренесуваат светските медиуми. Според новообјавена студија во „Нејчр генетикс“, околу 60 отсто од жителите на Јужна Азија се носители на овој генетски сигнал со висок ризик, додека во Европа процентот изнесува околу 15 отсто.
Генот наречен „ЛЗТФЛ1“ ги спречува клетките во дишните патишта и белите дробови да реагираат соодветно на вирусот. Генот бил идентификуван со спој на вештачка интелигенција и молекуларна технологија.
– Новооткриениот ген не е единствениот фактор што придонесува за индивидуалното ниво на ризик кај една личност. Возраста, сепак, игра голема улога во тоа колку е веројатно дека некој сериозно ќе се разболи – вели Џејмс Дејвис, еден од авторите на студијата.
За научниците сѐ уште е непознато како овој генетски код функционира и зошто го зголемува ризикот кај заболените од коронавирус, ниту ја знаат точната генетска промена која е одговорна за ваквата состојба.
– Причината зошто откривањето на генетската промена се покажа како толку тешко, е тоа што претходно идентификуваниот генетски сигнал влијае на геномот. Се покажа дека зголемениот ризик не настанува поради разликата во кодирањето на протеинот во генот, туку поради разликата во ДНК, што прави индиректен прекинувачки ефект – вели Џим Хјуз, професор на Универзитетот во Оксфорд.
Генетскиот фактор што го откриле научниците објаснува зошто некои луѓе сериозно се разболуваат откако ќе го прележат коронавирусот, а исто така покажува дека начинот на кој белите дробови реагираат на инфекцијата е критичен во закрепнувањето.
– Иако не можеме да ја смениме нашата генетика, резултатите покажуваат дека луѓето кои се носители на овој ген ќе имаат голема корист од примањето вакцина против коронавирусот – заклучува Дејвис.
