Економијата на Исланд расте побрзо од повеќето европски земји по воведувањето на пократка работна недела низ целата земја и без намалување на платите, според истражувањето објавено во петокот, што го пренесува индекс.хр.
Помеѓу 2020 и 2022 година, 51 процент од работниците во земјата ја прифатиле понудата за пократко работно време, вклучително и четиридневна работна недела, открија две аналитички агенции, истакнувајќи дека оваа бројка веројатно ќе биде уште поголема денес. Имено, минатата година Исланд забележа побрз економски раст од повеќето европски земји, а неговата стапка на невработеност е една од најниските во Европа, посочија од Институтот за автономија во Обединетото Кралство и Исландската асоцијација за одржливост и демократија (Алда).
-Оваа студија покажува вистинска успешна приказна: пократкото работно време стана широко распространето во Исланд… а економијата останува силна според голем број индикатори – рече Гудмундур Д. Харалдсон, истражувач во Алди.
Во две големи испитувања помеѓу 2015 и 2019 година, вработените во јавниот сектор во Исланд работеа од 35 до 36 часа неделно, без намалување на платата. Многумина од нив претходно работеа по 40 часа неделно.
Испитувањата опфатија 2.500 луѓе, повеќе од 1 процент од работоспособното население на Исланд во тоа време, и беа насочени кон одржување или зголемување на продуктивноста и истовремено подобрување на рамнотежата помеѓу работата и животот. Истражувачите открија дека продуктивноста останува иста или подобрена на повеќето работни места, додека благосостојбата на работниците „драматично“ се зголемила во многу сегменти, од перцепиран стрес и „работно исцрпување“ до рамнотежа помеѓу работата и животот. По овие студии, исландските синдикати преговараа за намалување на работното време за десетици илјади нивни членови низ целата земја.
Во 2023 година, економијата на Исланд порасна за 5 отсто, стапка на раст која е втора по Малта меѓу богатите европски економии, тврди Меѓународниот монетарен фонд во најновиот Светски економски извештај. Ова е многу повисока од просечната стапка на раст на Исланд од речиси 2 отсто во деценијата помеѓу 2006 и 2015 година. Сепак, ММФ предвидува значително побавен раст на Исланд оваа и следната година поради падот на домашната побарувачка и забавувањето на растот на потрошувачката во туризмот. Патем, низ целиот свет беа спроведени низа експерименти со четиридневната недела. Ова вклучуваше успешно тестирање во 2022 година на 33 компании, од кои повеќето се лоцирани во САД и Ирска.
