Триесет и двегодишниот Стефан Петрушевски веќе четири месеци води тешка битка за закрепнување по сериозна повреда. Неговото семејство сега бара помош од хуманите граѓани за да му овозможи продолжување на лекувањето и специјализирана рехабилитација во Германија, за што се потребни 280.000 евра.
Стефан сè уште се наоѓа на Клиниката за интензивно лекување и реанимација, каде што лекарите се грижат за неговата состојба. Иако првичните прогнози биле неповолни, неговите најблиски велат дека тој покажува знаци на подобрување, што им дава надеж дека со соодветен третман ќе успее да закрепне.
Неговата сестра, Габриела Љубовска, упати емотивен апел до јавноста, посочувајќи дека за натамошното лекување на Стефан е неопходна специјализирана рехабилитација која, според семејството, не може да ја добие во Македонија.
Германска клиника понудила програма за лекување и рехабилитација, но потребната сума од 280.000 евра е преголем финансиски товар за семејството.
Според неговата сестра, трошоците за овој третман не се покриени од Фондот за здравствено осигурување, поради што семејството е принудено да побара помош преку донации.
Дома го чекаат сопругата и едногодишниот син
Најголемиот мотив за закрепнувањето на Стефан е неговото семејство. Дома го чекаат сопругата и нивниот едногодишен син Алексеј, со надеж дека наскоро повторно ќе бидат заедно.
Неговите најблиски веруваат дека лекувањето во Германија може да му даде можност за подобро закрепнување и враќање во секојдневниот живот.
Тие ги повикуваат сите граѓани, компании и хумани луѓе да помогнат според своите можности. Секоја донација, без оглед на износот, е важна во обидот да се соберат потребните средства.
Како може да помогнете?
За Стефан се отворени сметки за донации во денари и евра, а семејството најавува и активирање телефонски броеви за донирање.
Средства може да се донираат и преку хуманитарната платформа „Павел Андреев“, на следниот линк:
Донирајте за лекувањето и рехабилитацијата на Стефан Петрушевски
Пред Стефан е долг пат до закрепнувањето, но неговото семејство не ја губи надежта. Со заедничка хуманост и солидарност, секој од нас може да придонесе тој да ја добие потребната медицинска грижа и повторно да биде покрај своите најблиски.
