Фондот за здравствено осигурување (ФЗОМ) ги засилува контролите во здравствените установи со кои има склучено договор, со посебен фокус на наплатата на здравствените услуги и откривањето евентуални неправилности, особено во случаи на двојна наплата.
Од Фондот информираат дека контролите имаат за цел да утврдат дали здравствените установи ги почитуваат договорните обврски и законските прописи, вклучително и дали за една иста здравствена услуга се наплатуваат средства и од ФЗОМ и од пациентот.
ФЗОМ потсетува дека осигурениците немаат обврска да плаќаат дополнителни средства за услугите што се покриени со задолжителното здравствено осигурување и се обезбедуваат во установи со кои Фондот има склучено договор. Исклучок е законски утврдената партиципација, доколку таа е предвидена за конкретната услуга.
Ова правило се однесува на здравствените услуги во примарната, секундарната и терцијарната здравствена заштита, согласно правата и условите утврдени со закон.
Во рамки на контролите, особено внимание ќе се посвети на усогласеноста меѓу реално извршените и фактурираните услуги, износите што им се наплатуваат на осигурениците, како и почитувањето на прописите за партиципација.
Од Фондот нагласуваат дека здравствените установи се должни на видно и достапно место да ги истакнат информациите за висината на партиципацијата и за секое извршено плаќање да издадат соодветен законски доказ. Осигурениците, пак, имаат право да бидат јасно информирани кои услуги ги покрива Фондот и колкав износ, доколку е предвиден, треба да платат.
Доколку при контролите бидат утврдени неправилности, ФЗОМ најавува преземање соодветни мерки во рамки на своите надлежности, согласно договорите со здравствените установи и важечките прописи.
Осигурениците кои имаат информации за евентуална неоснована наплата на здравствени услуги можат да се обратат до Секторот за контрола на Фондот. Пријавите ќе бидат разгледани со почитување на приватноста и заштитата на личните податоци.
Со засилените контроли, ФЗОМ најавува поголема заштита на правата на осигурениците, одговорно управување со средствата од задолжителното здравствено осигурување и поголема отчетност на договорните здравствени установи.
