Украинскиот претседател Володимир Зеленски предложи директна средба со рускиот претседател Владимир Путин со цел да се постигне договор за завршување на војната во Украина.
Како што соопшти кабинетот на Зеленски, Киев предлага преговорите да се одржат во трета земја, при што како можни домаќини се споменуваат Швајцарија, Турција или некоја арапска држава. Според украинскиот лидер, Европа и САД треба да учествуваат во процесот како гаранти на безбедноста.
– Доста е со војна. Украина предлага оваа војна да заврши праведно, достоинствено и со гаранции дека нема повторно да се разгори – порача Зеленски, пренесе „Би-би-си“.
Тој предложи и целосен прекин на огнот за време на преговорите, како и размена на сите воени заробеници.
Во своето обраќање, Зеленски го обвини Путин дека речиси половина од своите 26 години на власт ги поминал водејќи војна против Украина. Според него, руските ресурси се намалуваат, а загубите на руската армија надминале 30.000 луѓе, при што Москва нема да успее да ги оствари своите воени цели.
Од друга страна, рускиот претседател Владимир Путин претходно изјави дека Москва е подготвена на компромис и мировен договор, доколку и Украина покаже подготвеност за отстапки.
– Несомнено сме подготвени и сакаме да постигнеме договор со Украина по мирен пат, врз основа на она што беше разговарано за време на состанокот со претседателот Трамп во Анкориџ – изјави Путин.
Предлогот на Зеленски доаѓа во момент кога двете страни повторно испраќаат сигнали за можност од дипломатско решение на повеќе од четиригодишниот конфликт.
