Во текот на изминатата недела, купувањето гласови и фалсификувањето на резултатите во некои изборни единици на неодамнешните парламентарни избори станаа главна тема во Бугарија
Бугарија
Бугарската Централна изборна комисија (ЦИК) не може да ги промени резултатите од неодамнешните парламентарни избори и покрај неспорните видеодокази за манипулација, изјави во неделата претседателката на комисијата, Камелија Нејкова. Во текот на изминатата недела, купувањето гласови и фалсификувањето на резултатите во некои изборни единици на неодамнешните парламентарни избори станаа главна тема во Бугарија, пренесува „Еурактив“.
Проруската партија Величие доби 3,999 отсто од гласовите, само 29 гласа помалку од четирите отсто потребни за влез во парламентот. Неколку дена по објавувањето на резултатите, видеоснимка од националната телевизија БНТ покажа дека партијата била дискриминирана при пребројувањето на гласачките ливчиња. Сепак, резултатот во Величие не беше променет, фаворизирајќи ја водечката партија ГЕРБ на поранешниот премиер Бојко Борисов. Ова му дава на Борисов повеќе опции за формирање влада.
– Корекција на резултатите што се ставени во изборниот документ, врз основа на прекршувањата прикажани од снимките на ЦИК, не е можна со закон – рече претседателката на ЦИК, додавајќи дека парламентот треба да го измени законот за да овозможи промена на резултатите.
Јавниот радиодифузен сервис БНТ ги истражуваше изборите во општината Гармен во југозападна Бугарија, при што видеоснимка од пребројувањето на гласачките ливчиња покажува 262 гласа за одредена политичка сила, но потребни се повеќе од 300. Националната телевизија вели дека снимањето на видеото престанува пред пополнување на документите, но на крајот има уште 100 дополнителни гласа. Постои сомнеж дека гласовите се дадени за МРФ-Нов почеток, предводена од бизнисменот Делјан Пеевски, кој е санкциониран од САД и Велика Британија за корупција. МРФ-Нов почеток е четврта по големина политичка сила во земјата, со 11,5 отсто од гласовите.
Поранешниот министер за внатрешни работи Иван Демерџиев, исто така, учествуваше активно во постизборната дебата, давајќи статистика за повеќе од 700 гласа што биле фалсификувани при пребројувањето.
Партијата Величие соопшти дека ќе бара парламентарните избори да бидат прогласени за незаконски, а групата доби поддршка од популистичката партија Има таков народ, која влезе во парламентот. Во четвртокот вечерта, Борисов од ГЕРБ, им вети на амбасадорите на ЕУ во Софија дека ќе направи сѐ што е во негова моќ за да формира влада со целосен мандат. Р.С.
