Телефонските повици и испраќањето пораки или користењето услуги за пренос на податоци во странство (за исти или други цели), т.е. надвор од областа на покриеност на мрежата на вашиот мобилен оператор, може да бидат многу скапи. Затоа треба да бидете особено внимателни кога патувате некаде, како и да се подготвувате навреме, за што дефинитивно ќе ви помогнат овие совети. На пример, синхронизацијата на податоците и апликациите од трети страни што работат во заднина се најчестиот проблем што може да доведе до огромна сметка поради високите трошоци за роаминг во мрежата. Овие совети може да ви помогнат да спречите да ви се случи тоа.
1. Информирајте се: Повеќето мобилни оператори во светот ќе ве известат преку СМС кога вашиот уред е во роаминг. Пред да одите, проверете кај вашиот провајдер дали овие известувања се стандардно овозможени. Распрашајте се за неговата услуга за роаминг во мрежите на земјата во која патувате, бидејќи видовите и износите на надоместоците и политиките за наплата може да варираат од земја до земја и од мрежа до мрежа.
2. Размислете што навистина ви треба: Откако ќе ги дознаете цените за роаминг и другите важни детали од вашиот провајдер, размислете за вашите потреби за повици, пораки и интернет во странство. Размислете дали, каде и кога ви се потребни повици, пораки, пристап до интернет (размислете за достапноста на вифи-мрежите на вашата дестинација), џипиес во реално време и/или други услуги. Затоа, донесете одлука која услуга за роаминг ќе ја платите.
3. Исклучете го роамингот: Ако не ви требаат услуги за податоци додека патувате, исклучете ги роамингот на податоци и синхронизацијата на податоците на уредот пред да го напуштите опсегот на вашата мрежа. Иако поставките варираат во зависност од марката, моделот и возраста на телефонот, како и од оперативниот систем што го користи, овие опции се наоѓаат во општите поставки на уредот и не би требало да имате проблем да ги пронајдете.
4. Обрнете внимание на апликациите: Имајте предвид дека дури и ако ги исклучите роамингот и синхронизацијата на податоците, апликациите од трети страни може повторно да ги вклучат. Затоа треба да бидете сигурни дека немате инсталирано апликации што можат да ги променат поставките за роаминг. Ако сакате само да остварувате и примате повици и не сте сигурни дали имате апликација што може повторно да го вклучи роамингот на податоци, размислете да земете друг телефон за патувањето и/или да купите локална сим-картичка на вашата дестинација.
5. Авионски режим и апликации за разговор: Ако сакате да користите само пристап до вифи-мрежи, префрлете го телефонот во авионски режим. Автоматски го исклучува преносот на податоци од мобилен и радио, но можно е истовремено да се остави вклучен вифи на повеќето уреди. Секако, во тој случај можете да користите апликации како Гугл војс за телефонски повици, како и опции за повици преку популарните апликации за разговор на Месинџер, Вибер, Ватсап.
6. Следете ги вашите трошоци: Повеќето телефони и даватели на услуги ви дозволуваат да го следите користењето на вашите податоци со апликација или посебен број. Исто така, постојат апликации од трети страни за следење и проверка на користењето податоци.
7. Планирајте однапред: Пред вашето патување, ресетирајте го мерачот за користење податоци во поставките на телефонот за да можете да го следите користењето на податоците „од нула“. Пристапот до вифи можеби не е бесплатен во вашиот хотел, авион или воз, но трошоците за користење таков интернет обично се пониски од трошоците за роаминг на податоци. Исто така, размислете за купување припејд меѓународна услуга за широкопојасен интернет, која станува сè подостапна.
