„Да, инспекторе, претстава со грешки“ во режија на Синиша Ефтимов е новата претстава што театарот „Војдан Чернодрински“ во Прилеп премиерно ќе ја изведе утревечер, петок, од 19.30 часот на матичната сцена. Претставата е работена по мотиви на текст од Хенри Џонатан Хенри рече денешната прес конференција режисерот Синиша Ефтимов, кому ова му е прва соработка со прилепскиот театар.
– Претставата се вика „Да инспекторе, претстава со грешки“ базирана на современ англиски текст кој е популарен во светот. Направивме наша верзија на текстот. Претставата е некој мој поглед на она што ни се случува денеска во градот, во државата, во светот. Живееме во време кога сите се гледаме во очи и се лажеме дека се е ок и одиме натаму, а во принцип отмено пропаѓаме. Ако пропаѓаме бареме да биде забавата весела. Направивме одлична хит претстава, бидејќи ансамблот е одличен и беше задоволство да работам. Публиката точно ќе го осети она што ние го работевме во изминатиот период – изјави режисерот Ефтимов, посочувајќи дека било предизвик да работи во прилепскиот театар со долгогодишна традиција.
Во претставата играат Илија Волчески, Димитар Црцороски, Катерина Чакмакоска Клинческа, Александар Тодески, Марија Спиркоска Илијеска, Михајло Миленкоски, Наташа Ачански, Игор Трпчески, Ангела Наумоска и Димитар Ѓорѓиевски.
– Имавме супер процес. Мирен, кративен и од режисерот и од наша страна како актери. Се поклопивме со идеите и тоа како да изгледа финалниот производ. Создадовме заедно наше, а публиката ќе го препознае хуморот и веруваме дека ова ќе биде голем хит – изјави актерот Волчески.
Актерката Спиркоска Илијеска посочи дека имаат добра претстава.
– Она што го склопивме е претставата која ќе биде хит и ќе биде долго на репертоарот – изјави Илијеска.
За театарот, Јасмина Мицовска-Станкоска вели дека ова е втора премиера, поддржана од Министерството за култура.
– Несебично и нескромно сакам да потенцирам дека имаме одлична претстава во која публиката ќе ужива и ќе се бара влезница повеќе за секоја нејзина изведба – рече Станкоска.
Сценографијата и костимите во претставата се на Илина Ангеловска, драматург е Ивана Нелковска, преводот е на Дарко Јан Спасов, а тон мајстор и дизајн на звук е Томе Темелковски.
Ка.М.
