Владата на денешната седница го усвои Концептот на националната структура за водење на процесот за зачленување на Република Македонија во НАТО.
Како што соопшти на денешната прес-конференција националниот координатор на РМ за НАТО Стево Пендаровски, во националната структура има три дела. На највисоко политичко ниво ќе има Комитет за интеграција во НАТО, второто тело е Работен комитет за интеграција во НАТО, а третото тело е Секретаријат за Оперативен логистички план.
– Во Комитетот за интеграција ќе бидат претставници од сите тела, органи и институции кои имаат каква било поврзаност со НАТО-интеграцијата, рече Пендаровски и додаде дека ова тело ќе го предводи премиерот Зоран Заев.
Второто тело, односно Работниот комитет, како што појасни Пендаровски, ќе ги спроведува одлуките на Политичкиот комитет за интеграции.
Пендаровски рече дека третото тело е Секретаријатот на целиот тим кој ќе биде надлежен за оперативна логистичка поддршка на Работниот комитет за интеграција во НАТО.
– Во наредните неколку месеци Македонија треба да потврди дека целосно ги прифаќа сите одредби од основачкиот документ со кој НАТО Алијансата е формирана, рече Пендаровски.
