На градска фарма од 37 хектари во англискиот град Бат волонтери наведоа 1.250 нови видови инсекти во последните осум години, а експертите се изненадени и загрижени бидејќи во текот на летото откриле уште триесет нови, кои се преселиле таму поради екстремните температури предизвикани од климатските промени.
Градската фарма во Бат е најновата организација за зачувување на животната средина што укажа на присуството на досега невидени инсекти во тој дел од земјата пред климатската криза.
Волонтерите и експертите се загрижени поради појавата на 30 нови вида инсекти во Бат во текот на летото, бидејќи тие претходно беа присутни во областа само во зима, пишува „Гардијан“.
Екологот и активист Мајк Вилијамс, кој води евиденција за новите животни, рече дека инсектите и пајаковидните животни се важен показател за видовите што им помагаат на еколозите подобро да ги разберат ефектите од климатските промени врз природниот свет.
– Пајаците се класичен пример за тоа, бидејќи поради нивниот краток животен век и мобилност, тие реагираат на временските промени – рече тој.
На фармата пред три години за првпат беше забележан пајакот оса, кој е сѐ позастапен во околината.
– Никој не можеше да помисли дека ќе го видиме тоа. На почетокот на 1990-тите години можевме да го најдеме пајакот оса само на јужните брегови, во Дорсет. Тогаш Бат беше премногу северно за него, бидејќи таму беше премногу студено за него. Не можев ни да помислам дека еден ден ќе го видиме во овој регион, а неговото присуство овде е доказ за климатските промени – изјави Вилијамс.
Тој претходно работеше како професионален консултант за животна средина за организации како „Нечурал Ингленд“ и „Нешнл траст“, а сега живее на урбана фарма каде што ги проучува локалните промени, а не оние на национално ниво.
– Сѐ што гледам ме фасцинира и ме растажува. Нашето истражување за дивиот свет покажува дека климатските промени не се нешто што ќе се случи во далечна иднина. Во ливадите на Бат може да се слушне штурец само во последните дваесет години. Неговиот глас е јасен показател за климатските промени ако можеме јасно да го слушнеме – рече тој.
