По едномесечниот медиумски циркус за неславната шлаканица на 94-то доделување на „оскарите“, филмскиот свет веќе е подготвен да продолжи по еден од најзбунувачките настани годинава. Но дури и со десетгодишната забрана за актерот Вил Смит да присуствува на наградите, јавниот углед на Академијата продолжува да се влошува со наводи за злоупотреба на голем број постојни членови. Смит е петтиот човек кому му е одземено членството поради прекршување на кодексот на стандарди на Академијата.
Ажуриран во декември 2017 година, по движењето #MeToo, кодексот на стандарди на Академијата осудува „секаква форма на злоупотреба, вознемирување или дискриминација од страна на нејзините членови“, како и „злоупотреба на статус, моќ или влијание на начин што ги нарушува стандардите на пристојност “.
Поранешниот холивудски продуцент Харви Вајнстин беше првиот кому му беше одземено членството во Академијата во екот на движењето #MeToo. Осмислено од жртва на сексуален напад, движењето ја разоткри децениската историја на сексуални злоупотреби на Вајнстин.
Академијата исфрли двајца членови во ист ден во 2018 година. Роман Полански беше исфрлен 15 години откако освои „оскар“ за најдобар режисер („Пијанист“) и повеќе од 40 откако беше обвинет за силување на 13-годишно девојче. Тој побегна од САД една година откако се изјасни за виновен за незаконски секс со малолетничка во 1977 година и останува бегалец до ден-денес.
На актерот Бил Козби му беше отповикано членството по серијата обвинувања за силување, сексуален напад и сексуална злоупотреба на деца во период од повеќе од 40 години. Откако помина три години зад решетки од десетгодишната затворска казна, пресудата на Козби беше поништена и тој беше ослободен во октомври 2021 година.
Актерот Кармин Кариди, најпознат по улогата на Алберт Волпе во продолженијата на „Кум“, беше првиот исфрлен од Академијата во 2004 година, бидејќи дистрибуирал копии од филмови пратени до членовите. Според официјални лица на Академијата, други членови се избркани поради продажба на нивните билети за „оскарите“.
