Каква беше книжевната 2022 година
Издавачките куќи бележат една одлична година со голем број нови наслови, реизданија, промоции… Неколку наши издавачи ги споделуваат своите сознанија за тоа каква литература се читаше во изминатава година и кои беа најбараните наслови.
Издавачката куќа „Антолог“ објави над 80 наслови за сите вкусови и организира голем број книжевни настани.
– Особено сме горди на првите интегрални преводи од оригинален јазик на трите романи на Франц Кафка – „Америка“, „Замок“ и „Процес“, но и на најзначајниот книжевен настан за 2022 година – „Букстар“, фестивалот на европската литература, каде што читателите имаа шанса да присуствуваат на ексклузивни средби со авторите и да ги запознаат своите омилени писатели од Македонија и од цела Европа – ни споделија од „Антолог“.
Тие и оваа година продолжија со издавање на смрзнувачките скандинавски трилери. Актуелен наслов за 2022 година била книгата „Сакај ме повеќе од сѐ на светот“ од Мира Фурлан, потоа „Обвинета“ од Славенка Дракулиќ, „Долга реса крај морето“ од Изабел Аљенде, „Како пердув на ветрот“ од Софија Лундберј, како и делата на Олга Токарчук.
– Но „Антолог“ секогаш ги поддржува и домашните автори, кои несомнено пишуваат светски романи. Оваа година ги објавивме книгите „Татко ми Босфор“ од младиот тетовец Јован Илиески и „Прозорецот“ на Јордан Коцевски, а свои трети изданија доживеаја „Виенски гамбит“ на Анде Јанков и „Америка“ на Жарко Кујунџиски. Следната, 2023 година е испланирано да биде уште попријатна книжевна година. Им подготвуваме многу изненадувања на нашите читатели, кои нѐ инспирираат да бидеме одлични во тоа што го работиме – вели Ирина Тумбовска-Талеска од „Антолог“.
Во „Или-или“ најбаран наслов бил „Мојот маж“ од Румена Бужаровска.
– Оваа година со голем број читатели се стекна и Симона Јованоска со романот „Денот на црвот“, прогласен за Роман на годината. Генерално, а тоа навистина радува, интересот за македонските автори во „Или-или“ е одличен. Од преводната литература, очекувано, најголем интерес има за „Засолниште во времето“ од Георги Господинов, уште повеќе засилен по неговото гостување во Скопје. Убав интерес предизвикуваат и „Колибри“ од Сандро Веронези, „Тупаници“ од Пјетро Гроси, „Еврејска работа“ од Миколај Гринберг… – истакна Ненад Стевовиќ од „Или-или“.
Издавачката куќа „Арс ламина“ во 2022 година објави 220 нови изданија – од кои повеќе од половина се наслови за најмладата публика. Интересен податок е што 49 отсто од објавените наслови се од домашна продукција.
– Од домашната продукција, голем интерес имаше за новата книги на Зоран Спасов-Ѕоф, „Џабе живиш у Скопје: водич до сигурна смрт од смеење“, и за наградуваниот роман на Александар – „Хотел меѓу две војни“ – споделија од „Арс ламина“.
Голем интерес имало и за мотивациските книги за посреќен и поквалитетен живот, а од современите книжевни класици најмногу се читале книгите на Милан Кундера, од кои се издвојуваат „Неподносливата леснотија на постоењето“ и романите од најпознатиот современ турски писател Орхан Памук („Истанбул“ и „Нов живот“).
– Меѓу децата многу се популарни и книгите од серијалот „Исидора Мун“, а мошне купувана беше и сликовницата „Ѕвездено дете“ од Ване Костуранов – дополнуваат од „Арс ламина“.
И од издавачкиот центар „Три“ истакнаа дека во топ листата на најпродавани наслови има понекоја книга од сите жанрови.
– На пример, домашната книжевна сцена блесна со новиот роман на Венко Андоновски, „Папокот на светлината“, кој се вброи во најпродаваните само за еден месец. Познатиот Габор Мате ја оствари својата слава и меѓу нашите читатели. Векс Кинг со „Добри вибрации, добар живот“ и „Кафе-муабет со себеси“ од Кристен Хелмстетер, „Пред да се излади кафето“ и „Човекот кој шета книги“ ни потврдија дека читателите знаат да препознаат мајсторски напишани романи, а „Прекрасен свету, каде си“, „Љубовна хипотеза“ и „Девојките што горат“ дека го следиме читачкиот тренд, затоа што овие книги што се во нашите најчитани книги беа најбарани и во светот.
Ние книгољупците имаме моќ спомените да ги пакуваме во книга, а книгите ги паметиме според чувствата што нè обзеле додека сме ги читале, понекогаш повеќе отколку што се сеќаваме на самата содржина. А во тоа е и суштината, во чувствувањето на зборовите – изјавува Милена Силјаноска од „Три“.
