Американскиот претседател Доналд Трамп навести дека САД би можеле да останат во Иран и да ја „задржат нафтата“, повлекувајќи паралела со неодамнешниот американски договор за пристап до дел од нафтените резерви на Венецуела.
Трамп, кој престојуваше во Ирска на средби и на голф-турнирот „Ирски опен“ (Irish Open), повтори дека сè уште очекува војната со Иран да заврши годинава, можеби веднаш по американските меѓуизбори во ноември.
Тој изјави дека цената на горивото „драстично ќе се намали“ по завршувањето на војната. Изјавата следува во период кога конфликтот на Блискиот Исток и прекините во снабдувањето ја зголемија цената на нафтата над 100 долари за барел.
Американскиот претседател рече дека ќе прифати само „вистински договор“ и дека нема да се согласи на решение што, според него, не би имало никаква вредност. Тој, исто така, тврдеше дека Иран постојано бара продолжување на мировните преговори.
– На крајот ќе излеземе од Иран, освен ако не одлучиме да останеме и да ја задржиме нафтата, како во Венецуела – изјави Трамп.
Тој додаде дека приходите што САД ги остваруваат од договорот поврзан со венецуелската нафта „повеќекратно ги покриле трошоците за војната“, но не наведе конкретни податоци со кои би го поткрепил тврдењето.
Администрацијата на Трамп во август објави договор со кој САД добиваат значителни сопственички, управувачки и откупни права врз нафта од 17 полиња во Венецуела, со околу 65 милијарди барели докажани резерви.
Според Белата куќа, американското Министерство за одбрана добило удел од 35 проценти во матичната компанија на приватната нафтена фирма вклучена во договорот. Стејт департментот, пак, добил право по производна цена да откупува 20 проценти од нафтата произведена на полињата, како и првенство при купувањето на преостанатото производство.
Договорот предвидува и американски права во управувањето со компанијата, додека американските власти очекуваат значителен дел од произведената нафта да се преработува во рафинериите во САД.
Трамп и претходно ја споменуваше можноста САД да преземат контрола врз иранските нафтени ресурси. Во март тој изјави дека контролирањето на иранската нафта е една од опциите што ги разгледува неговата администрација.
