Генералниот секретар на Обединетите нации, Антонио Гутереш, изјави на самитот на Г7 во Јапонија дека е време да се реформираат Советот за безбедност и монетарниот систем „Бретон Вудс“, за да се приспособат на „реалностите на денешниот свет“.„Глобалната финансиска архитектура е застарена, нефункционална и нечесна“, рече генералниот секретар на Обединетите нации, Антонио Гутереш
Неопходна модернизација на двете институции што ги одразуваат односите на моќ од 1945 година
Генералниот секретар на Обединетите нации, Антонио Гутереш, говорејќи на прес-конференција во Хирошима, Јапонија, каде што се одржа самитот на Г7, рече дека е неопходно да се модернизираат двете институции што ги одразуваат односите на моќ од 1945 година.
Советот за безбедност на ОН, кој се состои од пет постојани членки – Соединетите Американски Држави, Русија, Обединетото Кралство, Кина и Франција – и од десет ротирачки членки, игра клучна улога во одржувањето на меѓународниот мир и безбедност. Сепак, Гутереш тврди дека неговата структура повеќе не ја одразува геополитичката реалност на 21 век!
– Глобалната финансиска архитектура е застарена, нефункционална и нечесна – рече тој, додавајќи дека тие не успеале да ја исполнат својата клучна функција како светски заштитен механизам.
Договорот од Бретон Вудс се однесува на повоениот договор за создавање на меѓународен монетарен систем. По конференцијата во Бретон Вудс, беа основани Меѓународниот монетарен фонд (ММФ) и Меѓународната банка за обнова и развој. Овие институции беа клучни за стабилизирање на светската економија по Втората светска војна. Валутите според овој систем беа поврзани со американскиот долар, кој беше врзан за златото. Меѓутоа, овој систем се распадна во 1971 година, кога Соединетите Американски Држави ја суспендираа конверзијата на долари во злато, означувајќи го крајот на „златниот стандард“.
