Глобалниот бран на побарувачка на енергија може да донесе уште три години нестабилност на пазарот и рекордно загадување од електраните, доколку земјите не направат значителни промени во начинот на производство на електрична енергија, предупреди Меѓународната агенција за енергетика (ИЕА).

Најголем пораст на побарувачката на електрична енергија е забележан минатата година, поради што имало недостиг во главните економии и историски висок скок на цените и рекордни емисии на загадување, соопшти ИЕА, пренесе Гардијан.
Во годишниот извештај на ИЕА се наведува дека ваквата состојба би можела да трае во следните три години, со сериозни последици за потрошувачите и економијата, доколку нема брзи структурни промени во производството.

– Остриот скок на цената на струјата неодамна создаде проблеми за многу домаќинства и компании ширум светот и постои опасност тие да бидат двигател на општествени и политички тензии – изјави извршниот директор на ИЕА, Фатих Бирол.

Глобалните цени на струјата пораснаа за шест отсто во 2021 година поради економското закрепнување по рецесијата на пандемијата во 2020 година. Ова е најголем пораст на цените од 2010 година, кога цената на струјата порасна поради закрепнувањето по светската економска криза во 2008 година.

Не само што цената на струјата забележа историски скок, туку и побарувачката беше најголема во историјата, со дури 1.500 терават часови, што е највисока забележана досега.
Речиси половина од побарувачката беше од Кина, која се зголемила за 10 проценти во однос на 2020 година. Кина и Индија претрпеа недостиг во втората половина од годината, бидејќи снабдувањето со јаглен не можеше да го следи темпото на термоелектраните, што доведе до економско забавување во Азија, велат од ИЕА.

Со енергетската криза се соочи и Велика Британија, каде цените на струјата достигнаа рекордни суми, бидејќи таа земја половина од струјата ја добиваше од гасни централи, чија цена исто така скокна, пишува Гардијан.
Глобалниот недостиг на електрична енергија доведе и до рекордно загадување, бидејќи некои економии се враќаат на поевтини извори на производство, како што се електраните на јаглен.

Од ИЕА повикуваат на поголеми инвестиции во технологиите со помали емисии на штетни гасови, вклучувајќи обновливи извори, енергетски ефикасни извори, како и нуклеарна енергија.
Во извештајот на ИЕА се наведува дека производството на електрична енергија од обновливи извори на енергија се зголемило за шест отсто во 2021 година, но тоа не било доволно за да се одржи трката со забрзана побарувачка.
Производството на електрична енергија на јаглен е зголемено за девет отсто, на гас за два отсто, а на нуклеарна енергија за 3,5 отсто.
Фатих Бирол наведува дека емисијата на јаглерод диоксид при производство на енергија се зголемила за седум отсто.