Во 2016 година, „Бличер рипорт“ направи листа за најтешки спортови на светот, заснована врз шест параметри: сила, издржливост, брзина, агилност, вештина и физичка сила
Според експерти за спортска медицина, трите најтешки спорта на летните олимписки игри (ЛОИ) се ватерполото, гимнастиката и пливањето. Американскиот „Инсајдер“ побара мислење од шестмина професионалци од областа на спортската медицина за да ги именуваат најтешките спортови на Игрите во Токио, врз основа на потребната физичка, техничка и ментална сила.
Ватерполото беше прогласено за физички најнапорен олимписки спорт. Во 2016 година, „Бличер рипорт“ го прогласи за „најтежок спорт на светот“ заснован врз шест параметри: сила, издржливост, брзина, агилност, вештина и физичка сила.
– Има туркање под вода, триесетина минути постојано пливање, има удирање слично како во хокејот на мраз и во фудбалот. И сѐ без да се допре тлото, да не се удават и да постигнат гол – изјави за „Инсајдер“, Нандини Колинс, тренер и физиолог.
Д-р Нареш Рао, американски лекар на ватерполо-тимот на САД, вели дека тој спорт е напорен затоа што бара аеробен (за издржливост) и анаеробен (за спринтови) капацитет. Гимнастиката, пак, бара многу техничка и ментална сила. Четворица од седумте експерти ја именуваа гимнастиката за најсложен спорт во барем една од категориите: физичка, техничка и ментална сила.
– Од гимнастичарите се бара да имаат рамнотежа, сила, флексибилност и издржливост на горните и на долните екстремитети ако сакаат да достигнат врвно ниво – вели д-р Кетлин Девенпорт, директор на физијатрија од Флорида, додавајќи оти им треба „екстремно ниво на фокус“ за да ги направат акробациите.
Пливањето „доби“ еден глас за целокупната цврстина и за менталната сила, изјави за „Инсајдер“ д-р Тејт Гредицер, поранешен професионален ватерполо-играч. Боксот, десетобојот и атлетската трка на 800 метри добиле глас за физички најпредизвикувачки спортови, пишува „Инсајдер“. Сурфањето и скокот со стап добиле гласови за најтешки технички спортови. Тенисот и маратонот добиле глас за ментална сила, иако сите олимпијци се исклучителни во тој дел.
– Повеќето од оние на кои им недостига ментална сила не стигнуваат далеку само со суров физички талент, без оглед на спортот – вели д-р Кевин Бернштајн.
