Лидерот на најголемата алијанса во блокот на Европа, Манфред Вебер, истакна дека ЕУ треба да воведе мораториум на кинеските инвеститори што во моментов се потенцијални купци на европските компании што имаат деловни проблеми поради кризата со коронавирусот
ПОВИК ДА СЕ ЗАШТИТАТ ФИРМИТЕ ПОГОДЕНИ ОД КОВИД-19
Манфред Вебер, германски конзервативец и шеф на централнодесничарската групација во парламентот на ЕУ, Европска народна партија, за германски весник изјави дека се залага за дванаесетмесечна забрана за кинеските инвеститори да купуваат европски фирми.
– Гледаме дека кинески компании, делумно финансирани од државата, сѐ повеќе се обидуваат да откупат европски компании што се евтини за преземање или што наидоа на економски тешкотии поради кризата со коронавирусот. Затоа, Европската Унија треба да реагира на координиран начин и да ѝ стави крај на „кинеската трговска турнеја“, со наметнување дванаесетмесечен мораториум за продажба на европски компании сè додека кризата со коронавирусот не заврши – рече Вебер.
Кина и ЕУ започнаа преговори за сеопфатен договор за инвестирање во 2013 година и оттогаш одржаа голем број рунди на разговори. Главна спорна точка е реципрочниот пристап до пазарите.
Лидерите на Кина и ЕУ треба да се состанат на специјалниот самит во септември, иако пандемијата на коронавирусот отвори сомнеж за тоа дали состанокот може да се одржи како што беше планирано.
– Кина ќе биде нашиот најголем конкурент во иднина, во економски, социјален и политички план – вели Вебер.
Тој додава дека Кина ја гледа како стратегиски конкурент за Европа, која претставува авторитарен модел на општеството, која, пак, во исто време сака да ја прошири својата моќ и да ги замени САД како водечка сила.
– Европа треба да ја сфати сериозно Кина и да покаже почит кон земјата како светска сила, но пред сè ние треба да бидеме будни околу тоа – додаде Вебер.
Во таа насока, германската влада минатиот месец се согласи да ги заостри правилата за заштита на домашните фирми од несакани преземања на инвеститорите од земји што не се од Европската Унија.
Овој потег доаѓа во време кога најголемата економија во Европа и ЕУ како целина ги преиспитуваат односите со Кина во услови на зголемени инвестиции во критичните сектори од кинески државни претпријатија.
Германските власти го опишаа кинеското преземање во 2016 година на баварската фирма од областа на роботиката „Кука“ како повик за будење што ја истакна потребата за заштитени стратегиски делови на економијата.
Обидот на државна кинеска компанија во 2018 година да купи удел во електроенергетската мрежа „Хертз“ во Германија исто така ги загрижи германските умови за крајната состојба. Откако Берлин не успеа да најде алтернативен приватен инвеститор во Европа, германската државна банка КфВ влезе во процесот за да ги оттргне Кинезите од целата игра.
