Дали често се чувствувате уморно, раздразливо, имате болки во мускулите и послаб имунолошки систем? Причината може да биде недоволно количество на протеини во вашата исхрана. Иако многу луѓе мислат дека внесуваат доволно хранливи материи, телото можеби не добива доволно квалитетни протеини, што е клучно за енергијата, силата и целокупното здравје. Затоа ни испраќа суптилни сигнали дека му недостига нешто.
Постојано чувство на глад
Ако сè уште чувствувате глад по оброкот или посегнувате по ужина веднаш по ручекот, можеби не внесувате доволно протеини. Протеините ги стимулираат хормоните што даваат чувство на ситост, па нивниот недостиг може да доведе до постојана потреба за храна. Исхраната богата со протеини помага во контролата на апетитот и зачувувањето на мускулната маса, пишува „Индекс фит“.
Ослабен имунитет
Недостигот од протеини може да го ослабне имунолошкиот систем. Телото ги разградува протеините во аминокиселини, кои се неопходни за производство на имуни клетки и антитела. Ако нема доволно од нив, телото потешко се брани од настинки и инфекции и закрепнува побавно од вообичаено.
Болки во мускулите
Ако чувствувате болка дури и по лесна физичка активност, можеби ви недостигаат протеини. Тие се потребни за обнова и зајакнување на мускулите, а без нив, телото почнува да го користи сопственото мускулно ткиво. Консумирањето протеини за време или по вежбањето го забрзува закрепнувањето и ја намалува болката.
Бавно закрепнување од повреди
Големи количества на протеини се потребни за заздравување на раните, закрепнување од операции или повреди. Ако нема доволно од нив, на телото му недостига основниот материјал за поправка на ткивата, па целиот процес е побавен.
Лоша состојба на косата, кожата и ноктите
Протеините се основа на здрава коса, кожа и нокти. Нивниот недостиг може да предизвика опаѓање и истенчување на косата, кршливи нокти и губење на еластичноста на кожата. Без доволно аминокиселини, колагенот и еластинот не можат да се произведуваат, па кожата старее побрзо.
Промени во расположението
Ако често имате лошо расположение, причината може да лежи во несоодветната исхрана. Протеините се вклучени во производството на серотонин, хормонот на среќата, а исто така помагаат во стабилизирање на нивото на шеќер во крвта. Тоа спречува ненадејни промени во расположението.
