Куманово
Центарот за култура „Трајко Прокопиев“ од Куманово по четврти пат ќе биде домаќин на семинарот за традиционална музика и игра, овој пат под наслов „Глобалното кај локалното“, со поддршка од страна на Министерството за култура и туризам како проект од национален интерес. Семинарот ќе се одржи на 8 и 9 април во Центарот за култура во Куманово.
– Во изминатите три години се реализираа едукативни работилници, кои младото, пред сѐ, кумановско население го едуцираа за сопственото културно наследство. Се повлекоа значајни паралели со соседните етнички предели и целата област каде што младите од овој дел живеат и им беа пренесени како значаен дел од културното наследство на целата земја – вели Дени Синадиновски од НУЦК „Трајко Прокопиев“.
Тој додава дека само преку спознавање на локалното може да се стигне до глобални знаења, па оттаму и темата на годинашниот семинар.
– Годинешниот семинар под наслов „Глобалното кај локалното“ ќе биде вистинско доживување за младата популација во Куманово и пошироко. Дебата, дискусија, методологија, критика ќе биде основата на овој семинар. Што значи орото „Поступано“ за северното игроорно подрачје, што значи гајдата како инструмент во брсјачката етнографска целина, што значи групата „Костручанки“ за нашата земја, што значи празникот Четересе во градот Штип, што значи да се обработи и постави обред на сцена, се само некои од темите за дискусија на првиот ден од семинарот. Накратко, како глобалните сегменти влијаат на локалните – појаснува Синадиновски.
Во вториот, практичниот дел на семинарот, ќе бидат обработени најкарактеристичните ора од сите пет игроорни подрачја: „Копачка“, „Беранче“, „Тешкото“ и „Поступано“.
