Жалам што премиерот и министрите во владата во вакви исклучително сложени и важни моменти за Македонија, граѓаните и стопанството никако не можат да ја надминат својата суета, еднаш да го остават политиканството и да се стават на страната на државата и граѓаните, порача опозицискиот лидер, Христијан Мицкоски.
– Побарав средба со Димитар Ковачевски за да го образложам концептот за оваа но и за следната година, како да се оптимира искористувањето на домашните ресурси и да се обезбеди евтин енергенс, дезертираше, одби. Го повикав на ТВ дебата пред македонската јавност, повторно дезертираше, одби со изговор дека не било сега време. Го повикав и Фатмир Битиќи како одговорен за економски прашања во владата во седиштето на ВМРО-ДПМНЕ, одби да дојде и ме повика на економски совет да сум го презентирал концептот, бидејќи така успешно работеле за корона пандемијата итн… Последни во Европа почнавме со вакцинација откако баравме милост насекаде да ни дадат донација вакцини, додека владата преку фирма од Хонгконг со основна дејност трговија со јужноамериканско овошје се обидуваше да испазари дебели провизии од набавката на вакцините. Една од највисоките смртности од ковид имаме во Европа. Во Тетовската модуларна болница, ковид пациенти живи изгореа и што ли уште не…, но според Фатмир Битиќи успешно сме се справиле со ковид-кризата – пишува Мицкоски на социјалните мрежи.
Нема потреба од разговор зад затворени врати, му одговори Битиќи на Мицкоски
Лидерот на ВМРО-ДПМНЕ порача дека стои на располагање за да го објасни концептот што го нуди, но под одредени услови.
– Ако економскиот совет успешно го водевте немаше во „4 очи” да коленичите по соседството и да молите милост да ви дадат. Ако економскиот совет беше успешен сега ќе обезбедевте струја за ФЕНИ и Бучим и наместо клуч на врата ќе гореа печките како што горат за слични такви компании во соседството. Сте помислиле ли како им е сега на работниците кои останаа без работа и со болка во гради се мачат крај со крај да врзат за своите семејства, како да ја поминат зимата или тоа од црвените персијанци и кожните фотељи не се гледа јасно. Доколку сакате да покажете дека не се точни информациите за големи провизии од увозот на мазут, транспортот преку инстант-компании на јаглен и сѐ уште нејасната конструкција за гасот и затоплување на граѓаните, тогаш ви стојам на располагање да ви го објаснам концептот што го нудам. Одберете тим и дојдете во седиштето на ВМРО-ДПМНЕ во време и ден кој вас ќе ви одговара – напиша Мицкоски.
