Бугарија планира да обезбеди околу 150.000 вакцини против ковид-19 за нејзините балкански соседи, изјави денеска бугарскиот министер за здравство, Стојко Кацаров.
– Идејата е да се дистрибуираат до 150.000 дози меѓу нашите соседни земји на Западен Балкан – рече Кацаров пред новинарите, истакнувајќи дека официјална Софија добила барања од Македонија, Албанија, Косово и Босна и Херцеговина.
– Нашите потреби се целосно покриени, така што нема опасност за Бугарија да остане без вакцини – додаде тој.
Министерот исто така изјави дека утре треба да пристигне одговор од Европската комисија во врска со тоа како точно треба да дејствува Бугарија и дали може да донира или продава дози.
Тој истакна дека Бугарија сака да донира претежно вакцини на „Астра зенека“.
Бугарскиот претседател Румен Радев минатата недела изјави дека Софија планира да донира значителни количини вакцини за Македонија, што според „Ројтерс“, би можело да помогне во подобрување на затегнатите односи меѓу двете земји, кои беа нарушени од бугарското вето на разговорите на Македонија за пристапување во ЕУ.
Бугарија има најниска стапка на вакцинација во ЕУ, но Кацаров вели дека неговата земја договорила дози од 13 до 14 милиони според европската шема за дистрибуција на вакцини до крајот на годината и може да си дозволи да им помага на другите земји.
Грција ќе им достави вкупно 40.000 дози вакцини против ковид-19 на соседите Албанија и Македонија, изјави денеска портпаролот на грчката влада.
– Грција, во координација со Европската комисија, како што прават повеќето европски земји за своите соседи, ќе понуди вакцини… 20.000 дози за Северна Македонија и 20 000 дози за Албанија – рече на прес-конференција портпаролката Аристотелија Пелони.
Пелони не прецизираше кога тоа ќе се случи.
