Бројот на нови инфекции за време на петтиот бран на епидемијата на коронавирусот во Франција расте со алармантна брзина, соопшти денеска француската влада.
Бројот на нови случаи на ковид-19 на дневна основа е речиси двојно зголемен во текот на изминатата недела, објави британскиот весник „Гардијан“.
Седумдневниот просек на нови случаи вчера достигна 17.153, во споредба со 9.458 една недела претходно, соопштија здравствените власти, додавајќи дека зголемувањето е 81 отсто.
– Петтиот бран започнува со брзина на светлината – изјави владиниот портпарол Габриел Атал.
Досега зголемувањето на бројот на заразени не доведе до масовен прилив на пациенти со ковид-19 во болниците.
Властите веруваат дека малиот број пациенти на интензивна нега е резултат на високата стапка на вакцинација во Франција, за која веруваат дека е многу ефикасна против најопасните форми на ковид-19.
Од болниците вчера известија дека се лекуваат вкупно 7.974 пациенти со ковид-19, од кои 1.333 се на интензивна нега.
Воведувањето здравствени пропусници во текот на летото, исто така, помогна да се задржи ковид-19 под контрола, рече Атал.
Владата останува на ставот дека тежината на ограничувањата треба да ја сносат невакцинираните, а не вакцинирани лица, посочи Атал.
