Растaт тензиите во САД по акциите на Службата за имиграција и царинска контрола (ИЦЕ)
По два фатални оружени инциденти во Минеаполис, со видеодокази што сугерираат дека федерални агенти можеби ги игнорирале или ги прекршиле протоколите, зголемениот впечаток меѓу правните експерти и голем дел од американската јавност е дека Службата за имиграција и царинска контрола (ИЦЕ) на САД, како и граничната патрола, работи неодговорно и далеку надвор од нормите на спроведувањето на законот.
За време на напливот на илјадници федерални агенти во Минесота за сеопфатна имиграциска акција, федералните службеници ги застрелале и убиле Рене Гуд на 7 јануари и Алекс Прети во саботата. Агентите за имиграција беа видени низ целата држава како апсат американски државјани и легални имигранти, влегуваат во домови и возила без судски налози и користат прекумерна сила против набљудувачите и демонстрантите.
Како резултат на тоа дојде до зголемено незадоволство во врска со справувањето на претседателот Доналд Трамп со клучното прашање што му помогна да се врати во Белата куќа пред помалку од две години. Поранешни агенти на ИЦЕ предупредија дека однесувањето на агенцијата во Минесота и на други места толку многу ја оштетило нејзината репутација, што веројатно ќе биде потешко за ИЦЕ да ја исполни својата мисија за пронаоѓање и депортирање мигранти што нелегално престојуваат во земјата.
Трансформацијата на ИЦЕ беше цел на администрацијата на Трамп од почетокот на неговиот втор мандат. За неколку недели од неговата инаугурација, Трамп ги укина внатрешните упатства што им налагаа на агентите за имиграција да се фокусираат на депортирање луѓе со кривични пресуди и ги спречуваше од вршење апсења во училишта, судови и на места за богослужба.
Администрацијата исто така брзо ги ограничи механизмите што беа воспоставени за да ја спречат ИЦЕ да ја злоупотреби својата моќ. Намалувањето на персоналот минатата година ги оневозможи канцелариите задолжени за следење на однесувањето на службениците за имиграција, вклучувајќи ги омбудсманот за државјанство и имиграција и омбудсманот за притвор на имиграцијата.
Иако Трамп ја лиши ИЦЕ од долгогодишните „заштитни огради“ и надзор, агенцијата го спроведе својот најголем бран на вработувања досега, повеќе од двојно зголемувајќи ја својата работна сила, од 10.000 на 22.000, за помалку од една година. За побрзо да ги испрати агентите на терен, ИЦЕ ја скрати обуката во Федералниот центар за обука за спроведување на законот во сојузната држава Џорџија од 13 недели на шест недели. ИЦЕ исто така се откажа од долгогодишната возрасна граница за агенти, прифаќајќи нови агенти на возраст од 18 години и постари од 40 години.
Сегашната стратегија за имиграција на администрацијата на Трамп, која му дава приоритет на зголемувањето на депортациите, се рефлектира во внатрешните промени во самата ИЦЕ. Минатата есен неколку високи раководители на теренските канцеларии на ИЦЕ беа заменети со раководители од Граничната патрола и други агенции, објавија повеќе медиуми. Поранешен службеник на ИЦЕ, кому му беше дадена анонимност за да зборува отворено, во изјава за „Тајм“ вели дека внатрешните промени биле „загрижувачки“, бидејќи Граничната патрола никогаш претходно не ги спроведувала законите за имиграција во внатрешниот дел на Соединетите Американски Држави.
Сето ова се случува додека буџетот на ИЦЕ се зголеми од околу 10 милијарди долари годишно, на 85 милијарди долари, што ја прави агенција за спроведување на законот со највисока финансиска поддршка во земјата. Но, анкетите покажуваат дека јавното расположение се врти против ИЦЕ. Онлајн анкета спроведена еден ден откако Прети беше убиен покажа дека повеќе Американци го поддржуваат укинувањето на ИЦЕ отколку што се противат на него, при што 46 отсто го поддржуваат укинувањето, наспроти 41 отсто што се противат, додека 12 отсто се несигурни. Јасно мнозинство Американци, односно 58 отсто, се согласија со описот на тактиките на ИЦЕ како „премногу насилни“.
Линдзи Неш, професорка по право и експертка за спроведување на имиграцијата на Правниот факултет „Кардозо“ во Њујорк, вели дека администрацијата на Трамп дојде на власт со ветување за фрлање поширока мрежа од претходните администрации за позначајно намалување на бројот на луѓе што нелегално престојуваат во државата. Во пракса, тоа значи дека ИЦЕ не го исполни ветувањето од кампањата на Трамп да се фокусира на депортирање криминалци.
– Статистиката не покажува дека ИЦЕ врши апсења според она што го нарекува свои приоритети. Се апсат многу луѓе што немаат кривични пресуди – вели Неш.
Конзервативните уреднички одбори на „Волстрит журнал“ и „Њујорк пост“ се насочија против имиграциските акции во Минесота.
– Колку и да е благородна мисијата да се ослободи земјата од „најлошото од најлошото“, широката поддршка за неа сега брзо опаѓа – напиша „Пост“, предупредувајќи дека ако Трамп ги продолжи своите претходни закани за активирање на Законот за бунт во Минесота, тоа ќе „се врати како бумеранг“. „Журнал“ го нарече пукањето во Прети „морален и политички дебакл“ за претседателството на Трамп и побара од ИЦЕ да „паузира“ со работа во Минеаполис. Дури и републиканскиот гувернер на Тексас, Грег Абот, еден од најгласните застапници на спроведувањето на имиграциските закони во земјата, изјави дека ИЦЕ треба да ги „рекалибрира“ своите операции во Минесота.
Како знак дека претседателот можеби е отворен за смирување на тензиите во Минесота, Трамп напиша на неговата мрежа „Трут сошл“ дека имал „многу добар разговор“ со демократскиот гувернер на Минесота, Тим Волц, и дека двајцата „всушност, се чинело дека се на слична бранова должина“. Трамп исто така рече дека го испраќа својот „граничен цар“ Том Хоман, поранешен вршител на должноста шеф на ИЦЕ, во државата за да разговара со локалните власти и дека Хоман ќе му поднесува извештаи „директно“ нему.
Одредени правни експерти тврдат дека администрацијата на Трамп создала попустлива атмосфера за службениците за имиграција да користат прекумерна употреба на сила. Откако Рене Гуд беше застрелана на 7 јануари, заменик-шефот на кабинетот на Белата куќа, Стивен Милер, им упати порака на сите службеници на ИЦЕ: „Вие имате имунитет да ги извршувате вашите должности и никој – ниту еден градски службеник, ниту еден државен службеник, ниту еден нелегален странец, ниту еден левичарски агитатор или домашен бунтовник – не може да ве спречи да ги исполните вашите законски обврски и должности“. Потпретседателот Џ.Д. Венс рече дека полицаецот што пукал во Гуд „е заштитен со апсолутен имунитет“. Но се чинеше дека Венс потоа го негираше таквото тврдење за време на прес-конференција во Минеаполис минатата недела, велејќи дека полицајците ќе се соочат со дисциплински казни доколку ги прекршат политиките или законот.
Американската унија за граѓански слободи помогна во поднесувањето тужба во федералниот суд во Минесота, барајќи од ИЦЕ да го прекине моделот на активности што вклучуваат апсења без налози, запирање луѓе без веродостојна причина и расно профилирање. Тој случај го поведе 20-годишен американски државјанин по име Мубашир Калиф Хусен, кој тврди дека на 10 декември во Минеаполис, додека одел на ручек, бил запрен од маскирани агенти на ИЦЕ, кои го ставиле во џип и го однеле во федерална зграда, каде што му ставиле лисици и му биле земени отпечатоци од прстите пред да биде ослободен. Иако таквата судска постапка може да доведе до некои промени, постојат ограничувања на можноста за тужба против федерален службеник за штета поврзана со дејства во вршење на службената должност.
