Нега и убавина
Топлите есенски денови ја продолжуваат маката на многумина што имаат болни и изразени вени, а мораат да поминуваат време во канцеларии облечени во долги панталони, фустани и најлонски чорапи. Според податоците на Светската здравствена организација, голем број луѓе денес страдаат од изразени вени и капилари, што во многу случаи им се припишува на пасивен стил на живот и лоша, главно сува и мрсна исхрана.
Како што објаснуваат лекарите, варикозните вени се појавуваат поради висок крвен притисок присутен во површинските вени и поради ослабени крвни залистоци, кои, наместо да ја придвижуваат крвта исклучиво кон срцето, ја движат двонасочно, па таа се враќа и се собира на одредени места во вената, поради што на некои места на нозете можат да се видат дебели испакнувања. Ова нарушување особено ги погодува лицата што долго стојат или седат, а занимањата што според истражувањата се најчесто погодени се учители, келнери и вработени во канцеларии.
Ризикот е особено голем и кај трудниците, бидејќи плодот притиска крвни садови, а меѓу загрозените има многу такви кај кои станува збор за наследен фактор. Многумина на кои вените им отекуваат секое лето и создаваат голем проблем, најмногу би сакале веднаш да одат на операција, за да го решат. Сепак, лекарите пред да се одлучат за интервенција, ако не ја сметаат за итна и неизбежна, советуваат секојдневна грижа за здравјето, која може да спречи поголеми проблеми. На прво место е правилната исхрана. Како што најчесто велат, најдобра е урамнотежена исхрана, која подразбира пред сè разновидна, варена и топла полесна храна, која содржи помалку маснотии. Од млечни производи се препорачуваат оние со помалку маснотии. Исто така, наместо слатки, се препорачува храна што содржи природни шеќери, како овошје и житарки.
