Бројот на жртви во поплавите и лизгањата на земјиштето на индонезискиот остров Суматра достигна 248, а се стравува дека бројот ќе се зголеми – соопштија локалните власти.
Некои области на островот се речиси целосно блокирани поради оштетени патишта и прекинати комуникациски линии. Авионите за спасувачки операции доставуваат помош и залихи во тешко погодениот округ Централен Тапанули во покраината Северна Суматра, како и во други области.
Спасувачките операции се отежнати поради оштетените мостови и патишта, како и поради недостигот на тешка опрема.
Националната агенција за управување со катастрофи соопшти дека спасувачите откриле повеќе тела во Западна Суматра, со што бројот на жртви се искачи на 248, а повеќе од 100 лица сè уште се водат како исчезнати.
– Монсунските дождови во последната недела предизвикаа излевање на реките во покраината Северна Суматра. Поплавите го опустошија планинското село, однесоа илјадници куќи и згради – соопшти Националната агенција за управување со катастрофи.
Близу 3.000 семејства кои останаа без своите домови, се евакуирани и им беше обезбедено засолниште од државата.
