Секоја година велиме дека е најтешкиот Тур досега, но знам дека годинашниот беше на друго ниво. Уживав и имав добра форма и добри нозе, рече Погачар, кој трипати победи на Тур де Франс, а водеше со над четири минути предност пред вчерашната последна етапа годинава, во Париз
ВЕЛОСИПЕДИЗАМ
Тадеј Погачар речиси ја освои четвртата титула на велосипедската грантур-трка Тур де Франс во саботата откако се тркаше, како што тврди, во една од најтешките трки на Тур што ги возел, оставајќи го само возењето вчера попладне во Париз меѓу него и уште еден триумф во најголемата трка во светот, пишува агенцијата „Ројтерс“. Тој водеше пред Јонас Вингегор со четири минути и 24 секунди предност во генералниот пласман пред 21-та етапа, која вклучуваше спектакуларно финале со три искачувања на Монмартр во Париз, пресврт во однос на традиционалната парада на Елисејските Полиња.
– Секоја година велиме дека е најтешкиот Тур досега, но знам дека годинашната беше на друго ниво. Можеби еден ден поминавме малку полесно, но ако ги погледнете податоците низ целата трка, беше навистина неверојатно и тешко. Дури и денес речиси се потрудивме од почетокот до крајот – изјави Погачар за новинарите откако ја заокружи 20-та етапа во саботата во главната група.
Погачар, кој претходно победи на Тур во 2020, 2021 и минатата година, рече дека исцрпувачката маршрута го тестирала пелотонот до неговите граници.
– Морам да кажам дека иако беше најтешкиот, една од најтешките трки на Тур де Франс што некогаш сум ги имал, уживав и имав добра форма и добри нозе. Навистина се радувам на последниот ден – додаде Погачар.
Прашан за евентуално појавување на третата грантур-трка, Вуелта, подоцна годинава, што би можело дополнително да го зацврсти неговото место меѓу најголемите велосипедисти во случај на победа, Погачар остана неодлучен.
– Ќе одлучиме неколку дена по Тур де Франс, откако сѐ ќе се смири. Секоја година учествувам на Тур и би сакал еден ден да учествувам и на Вуелта, ќе видиме – рече Погачар, кој лани постигна редок двоен трофеј со освојување на Џиро д’Италија и на Тур де Франс, веќе победи на три од петте најпрестижни еднодневни трки, што доведе до споредби со белгискиот великан на сите времиња Еди Меркс, пишува „Ројтерс“. Н.М.
