Во Ротердам ќе играат Феенорд (една титула) и Милан (седум), а во Глазгов се среќаваат Селтик (една) и Баерн (шест). Синоќа имаше уште два такви дуела, Манчестер сити (една) – Реал Мадрид (15) и Јувентус (две) – ПСВ Ајндховен (една)
ФУДБАЛ – ЛИГА НА ШАМПИОНИТЕ
Со денешните четири меча ќе биде заокружен првиот дел од плејофот за пласман во осминафиналето на фудбалската Лига на шампионите, а на програмата се два нови дуела на некогашни европски прваци. Во Ротердам ќе играат Феенорд (континентален шампион во 1970 година) и Милан (1963, 1969, 1989, 1980, 1994, 2003 и 2007 година), а во Глазгов се среќаваат Селтик (1967 г.) и Баерн (1974,1975, 1976, 2001, 2013 и во 2020 година).
Синоќа имаше уште два дуела на некогашни европски прваци, и тоа Манчестер сити (2023 година) – Реал Мадрид (1956-1960, 1966, 1998, 2000, 2002, 2014, 2016-2018, 2022 и 2024 г.) и Јувентус (1985, 1996 г.) – ПСВ Ајндховен (1988 г.).
Денеска на програмата се и натпреварите Клуб Бриж – Аталанта (меѓу себе играат 24-от и деветтиот тим на табелата по лигашката фаза) и Монако – Бенфика (16-ти и 17-ти). Реваншите на програмата се идната недела.
Директно во осминафиналето се пласираа Ливерпул, Барселона, Арсенал, Интер, Атлетико Мадрид, Баер, Лил и Астон вила.
Ливерпул и Барселона не можат да се сретнат до финалето откако ги освоија првите две места во првенствената фаза на Лигата на шампионите. Во осминафиналето, во март, Ливерпул и Барселона ќе играат со Монако, Брест, Пари сен Жермен или со Бенфика. Арсенал, кој беше на третото место, и Интер ќе играат против Феенорд, Јувентус, Милан или против ПСВ Ајндховен. Астон вила и Лил, пак, ќе се сретнат со Спортинг, Клуб Бриж, Аталанта или со Борусија Дортмунд, а Атлетико Мадрид и Баер ќе се соочат со Селтик, Баерн, Манчестер сити или со Реал Мадрид. Двојките за осминафиналето ќе бидат одредени со ждрепка. Н.М.
ЛШ, ПЛЕЈОФ
Клуб Бриж – Аталанта 18.45 ч.
Феенорд – Милан 21 ч.
Селтик – Баерн 21 ч.
Монако – Бенфика 21 ч.
Брест – Пари сен Жермен синоќа
Манчестер сити – Реал М. синоќа
Јувентус – ПСВ Ајндховен синоќа
Спортинг – Борусија Д. синоќа
реваншите се идната недела
