Членовите на овој ансамбл доаѓаат од четири различни културни средини, но својот обединет музички јазик го пронашле во Холандија, за време на студиите на Кралскиот конзерваториум во Хаг
Ансамблот „Театро а ла мода“, составен од музичари што живеат и работат во Холандија, в четврток, со почеток во 20 часот, ќе настапи во Камерната сала на Филхармонијата. Во ансамблот свират македонската чембалистка Цветанка Созовска, Лилија Славни (барокна виолина) и Џошуа Читам (виола да гамба). На програмата се дела од Букстехуде, Телеман, Ј.С. Бах, Ж. Мари-Леклер, Форкере и Рамо.
Преземајќи го името од сатиричниот памфлет на венецијанскиот композитор Бенедето Марчело (напишан во 1720 година), „Театро а ла мода“ се посветува на изведување барокна музика, но во нејзиниот автентичен манир, онолку колку што постојат информации низ историјата за начинот на изведба. Членовите на овој ансамбл доаѓаат од четири различни културни средини, но својот обединет музички јазик го пронашле во Холандија, за време на студиите на Кралскиот конзерваториум во Хаг.
Комбинирајќи ги виртуозноста и длабокото изучување на автентичната барокна изведувачка практика, музичарите од „Театро а ла мода“ го истражуваат и го претставуваат репертоарот за различни инструментални комбинации за камерен состав, користејќи историски копии на инструменти, како што се виолина, флејта, обоа, фагот, виола да гамба, чембало. Нивниот репертоар го опфаќа периодот од раниот барок до појавата на класичниот музички стил.
Инаку, „Театро а ла мода“ редовно настапува во Холандија и веќе има остварено меѓународни дебија на различни музички фестивали низ Европа, во Исланд, Франција, Португалија, но и во Скопје и во Охрид.
На концертот во Скопје се претставуваат во формација трио со барокна виолина, виола да гамба и чембало, со програма специфична токму за овие инструменти од барокниот музички период. В.Д.
