Песната „Денување“ на македонскиот автор Стефан Костоски ја доби наградата „Енхалон“, која се доделува на „Струшките вечери на поезија“ за најдобра песна од млад автор прочитана на фестивалот. Комисијата во состав Стефан Марковски (претседател), Снежана Стојчевска и Виолета Танчева-Златева (членови) во своето образложение вели дека станува збор за песна со цврста структура.
– Наградената песна се издвои по уникатниот творечки пристап, кој се состои во густо исткаени метафори, со одреден степен на индиректност, што сведочи за индивидуалната поетска рефлексија, која не остава простор за излишни зборови.
Метафорите се нагласуваат со градацијата, која се воспоставува на ниво на строфи и на тој начин целата песна егзалтира во вид на метафора за самиот живот. Во тие рамки, смислата на песната концизно допловува од вешто изградените слики што се надоврзуваат едноподруго како на филм. Низ само три строфи, Стефан Костоски мајсторски ги доловува клучните пунктови што го обележуваат човековото векување – се наведува во образложението на комисијата.
Со поетското читање „Мостови“ и врачувањето на наградитe „Златен венец“, „Браќа Миладиновци“ и „Мостови на Струга“ заврши официјалниот дел на 62. издание на „Струшките вечери на поезијата“. Фестивалот се заокружи со Меѓународен поетски митинг во Скопје, на платото на Музејот на современата уметност.
