Кој беше ликвидираниот Ајман ал Завахири
Американските сили вчера го убиле лидерот на Ал каеда, Египќанецот Ајман ал Завахири, што е најголемиот удар за милитантната група откако нејзиниот основач Осама бин Ладен беше убиен во 2011 година. Завахири беше убиен во напад со дрон.
Според информациите дадени од американски официјални лица, Завахири бил на балконот од неговата безбедна куќа кога дронот испукал два проектила кон него.
Ајман ал Завахири беше водач на Ал каеда и висок лидер на исламистичките организации кои организираа и извршуваа терористички напади во Северна Америка, Азија, Африка и Блискиот Исток. Завахири беше вториот и последен емир на Египетскиот исламски џихад, често нарекуван како десната рака на Осама бин Ладен, а биографите на Бин Ладен го опишуваат како вистинскиот мозок на Ал каеда.
Завахири, египетскиот хирург за чија „глава“ САД нудеа 25 милиони долари, помогна во координирањето на нападите на 11 септември 2001 година, во кои загинаа речиси 3.000 луѓе. Американските разузнавачи со голема сигурност утврдија дека убиениот е Завахири, изјави за новинарите висок претставник на администрацијата. Други жртви немаше. Во последниве години се појавија неколку гласини за смртта на Завахири, а долго време се зборуваше дека тој е во лоша здравствена состојба, наведува Си-Ен-Ен.
Роден во 1951 година, Завахири израснал во богат кварт на Каиро, Египет, син на истакнат лекар и внук на познати научници. Неговиот дедо, Рабијаа ал-Завахири, бил имам на Универзитетот Ал-Азхар во Каиро. Неговиот пра-вујко, Абдел Рахман Азам, беше прв секретар на Арапската лига.
Завахири беше затворен поради неговата вмешаност во атентатот на египетскиот претседател Анвар Садат во 1981 година. Во тоа време, Завахири, млад лекар, веќе бил посветен терорист кој со години подготвувал заговор за да ја собори египетската влада.
Завахири го напуштил Египет во 1985 година и заминал во Пешавар, Пакистан, каде што работел како хирург кој лекувал борци кои се бореле со советските трупи во Авганистан. Таму, Завахири се сретнал со Осама бин Ладен, истакнат лидер на муџахедините, кој исто така се приклучил на борбата во Авганистан.
Тие се зближиле поради фактот што и двајцата се авганистански Арапи. По повторното обединување на Авганистан, Бин Ладен и Завахири се појавија заедно на почетокот на 1998 година за да го објават формирањето на Светскиот исламски фронт за џихад против Евреите и крстоносците, формално спојувајќи ги египетскиот исламски џихад и Ал Каеда. Во еден момент, Завахири беше личен лекар на Бин Ладен.
Завахири стана лидер на Ал Каеда откако американските сили го убија Бин Ладен во 2011 година. Тој беше постојано во движење откако започна инвазијата на Авганистан предводена од САД по нападите на 11 септември. Во еден момент, за влакно избегна американски напад на грубиот, планински регион Тора Бора во Авганистан, напад во кој загинаа неговата сопруга и децата.
Завахири не бил харизматичен лидер како Бин Ладен, според аналитичарот за национална безбедност на „Си-ен-ен“ Питер Берген.
– Тој не се покажа како многу компетентен водач на Ал каеда. Но, причината поради која мислам дека беше убиен во Авганистан во текот на викендот е затоа што почна да презема многу повеќе ризици. Така тој стануваше се поистакнат. значи, ми се чини дека тој би можел да биде причината поради која е откриен – изјави Берген.
